O Concello ofrece unha reunión informativa aos pais e nais da rapazada que participará nos campamentos de agosto

Será o 28 de xullo, pasado mañá, na Biblioteca Vidal Pazos. Ás 20:00 horas os da primeira quincena, ás 20:45 horas os da segunda e ás 21:30 horas os de Seixo

Os campamentos de conciliación do Concello de Marín son unha gran alternativa de lecer e de ocio para a rapazada durante o verán. Despois das dúas quendas de xullo e da oferta en Mogor, organizaranse agora as quendas de agosto na Laxe e en Seixo.

Pasado mañá, 28 de xullo, a Concellaría de Benestar Social convoca a todas as familias da rapazada participante a unha reunión informativa sobre o campamento. Será na Biblioteca Pública Vidal Pazos, dividido nas seguintes horas:

   20:00 - Para a primeira quincena no CEIP da Laxe
   20:45 - Para a segunda quincena no CEIP da Laxe
   21:30 - Para a primeira quincena en Seixo

Desde o Concello apostan por este tipo de campamentos como un xeito de facilitar ás familias da vila a conciliación nun momento, o verán, no que os nenos e as nenas non teñen obrigas escolares.

A oferta de ocio, ademais, ten unha parte de didáctica moi boa para os participantes, no que se lles trata de reforzar as aptitudes en diversas disciplinas, incluíndo o inglés.