• O documento foi aprobado por unanimidade e permite desbloquear unha actuación que xa fora comprometida no ano 2009 por parte do ente autonómico
• O alcalde, Luciano Sobral, vén de enviar á presidenta de Portos unha solicitude de reunión para abordar a reforma pendente do peirao de Covelo, en Samieira, que tamén figura no acordo asinado hai 14 anos
O Pleno da Corporación municipal aprobou, na sesión ordinaria do mes de xaneiro, o convenio para a execución da humanización, dotación de servizos e mellora integral da contorna do porto de Raxó, desde o propio peirao ata a PO308. Trátase dun proxecto no que o Concello de Poio asumirá o 30% do orzamento, cuxa contía total ascende a máis de 900.000 euros. Este trámite permite xa que Portos de Galicila poida iniciar a tramitación dunha obra que, tal e como recordaron os dirixentes municipais durante o debate, “é unha demanda histórica”, pendente de execución desde o ano 2009 e que “será realidade grazas á presión exercida polos colectivos que forman parte da Comisión de Seguimento dos portos de Raxó e Samieira”.
O alcalde, Luciano Sobral, amosou a súa satisfacción polo feito de que “por fin esteamos en disposición de que a Xunta inicie unha obra de gran calado, que suporá un gran cambio e transformación da fronte marítima de Raxó”. O rexedor sinala que “o Goberno local fixo os deberes” á hora de cumprir coa tramitación que lle correspondía e sinalou que “agora esperamos que os traballos se leven a cabo o antes posible”. Un punto no que tamén coincidiron tanto o alcalde Sobral como o equipo de Goberno foi na necesidade de que se continúe avanzando para que a Xunta dea cumprimento ao convenio asinado en 2009, que inclúe a reforma e recuperación do peirao de Covelo, en Samieira. Neste sentido, Sobral confirmou que desde Alcaldía xa se lle remitiu unha carta á presidenta de Portos de Galicia para solicitar a convocatoria dunha reunión para abordar este tema, tal e como se acordou na última sesión da Comisión de Seguimento, da que forman parte representantes de diferentes colectivos das parroquias de Samieira e Raxó.
O Goberno municipal ten claro que “hai que continuar esixindo a Portos de Galicia a que cumpra co acordo asinado hai 14 anos”, en referencia á “necesidade urxente” que hai de que tamén se complete a reforma en Covelo. Con respecto ao proxecto de Raxó, cómpre lembrar que finalmente a actuación incluirá as peticións que solicitou o seu día o Concello, recollendo as demandas do tecido social e asociativo. Así, ademais da dotación de servizos de pluviais, abastecemento e alumeado público, a zona tamén contará cun acabado uniforme que irá desde o porto ata o cruce coa PO-308. “É un espazo que se atopa moi degradado e que precisa dunha profunda transformación, habida conta da súa importancia para a dinamización de sectores como o pesqueiro, turístico e hostaleiro”, indica o Goberno local.
A aprobación do convenio realizouse apenas unhas semanas despois de que o Concello recibise o convenio e os informes xurídicos pertinentes por parte de Portos de Galicia. A documentación definitiva foi enviada o pasado 11 de xaneiro, polo que “as tramitacións realizáronse en tempo récord”.