Grupos Ecoloxistas, Comunidades de Montes, Asociacións de Veciños, Traídas de Auga, organizacións culturais, Sociedades de Caza e Pesca e Mulleres Rurais dos concellos de Ponte Caldelas, Fornelos de Montes, A Lama e Soutomaior manifestan o seu rexeitamento a esta proposta.
A Plataforma Veciñal celebrará este sábado 7 de maio ás 17 horas no Centro Sociocultural de Forzáns unha asemblea aberta para “constituirse en ferramenta de loita e concienciación cidadá contra as agresións aos ríos Verdugo e Oitavén”.
Máis de 80 colectivos ecoloxistas, Comunidades de Montes, Asociacións de Veciños, Traídas de Auga, organizacións culturais, Sociedades de Caza e Pesca, Mulleres Rurais e afectados de Ponte Caldelas, Fornelos de Montes, A Lama e Soutomaior uniron as súas voces para manifestar o seu rexeitamento á construción dun encoro no río Oitavén e contra o trasvasamento de auga desde o río Verdugo, tal e como propón un estudio encargado pola Confederación Hidrográfica do Miño-Sil e polo que aposta o Concello de Vigo.
Esta oposición veciñal constituirase en “ferramenta de loita e concienciación cidadá contra as agresión aos ríos Verdugo e Oitavén” a través dunha asemblea aberta que terá lugar este sábado 7 de maio, a partir das 17 horas, no Centro Sociocultural de Forzáns.
Entre os colectivos que se amosaron xa en contra do encoro no río Oitavén e o trasvasamento no Verdugo figuran máis de 30 comunidades de montes, 14 asociacións de veciños, 12 comunidades de augas, 10 asociacións culturais, 5 asociacións de Mulleres Rurais, 5 sociedades de caza, varios colectivos ecoloxistas, entre eles, A Rente do Chan-Pladever, e a Asociación Mariana Luso Galaica.
A asemblea aberta dotarase de elementos de autoorganización e comisións de traballo para opoñerse a esta proposta que atenta contra o medio ambiente, desde a elaboración de estudios técnicos que avalen a imposibilidade de acometer o encoro e o trasvasamento así como a elaboración de informes xurídicos, actividades de concienciación veciñal, mobilizacións, accións de conservación da flora e da fauna, etc.
Tamén está previsto que se refrende un manifesto que recolle en profundidade as consecuencias negativas que tería a implantación desta proposta para os ríos Verdugo e Oitavén e para toda a veciñanza da comarca e tamén se proporán medidas paliativas para unha mellor xestión da auga e a protección dos recursos hídricos e marisqueiros.
