Levarase a cabo sobre un percorrido longo de 24 quilómetros, outro 14 Kms. e un pequeno de 8 Kms.
Un total de 650 persoas formalizaron a súa inscrición para participar na III Andaina Concello de Campo Lameiro que se celebrará este domingo 22 de setembro sobre un percorrido longo de 24 quilómetros, outro de 14 quilómetros e un pequeño de 8 quilómetros, segundo informou o alcalde Carlos Costa e o Comité Organizador formado, entre outros, por Mónica Arza, Jesús García Ameijeiras e Paula Pazos, así como outras moitas persoas encargadas de varios departamentos e cometidos dentro do complicado e laborioso proceso de organización desta actividade que conta coa colaboración da Xunta e da Deputación de Pontevedra.
Esta iniciativa, impulsada polo Concello de Campo Lameiro, tenta reunir deporte, proxección turística do municipio e solidariedade, xa que o 50% da recadación das inscricións desta proba non competitiva irá destinada integramente para a “Fundación Andrea”, unha asociación que axuda aos nenos con enfermidades raras e de longa duración con moito tempo de hospitalización.
Este proxecto, ademais de estar coordinado polo Concello de Campo Lameiro, conta co apoio da práctica totalidade do tecido empresarial do municipio que permitirá ofrecer un aperitivo para todos os participantes así como o sorteo de varios produtos doados polas empresas da zona entre todos os deportistas.
Así, esta proba pedestre non competitiva pretende promocionar tamén dos distintos lugares e paraxes marabillosas que conforman o patrimonio natural e medioambiental do concello de Campo Lameiro, Capital da Arte Rupestre de Galicia, e a organización estableceu un percorrido circular con varios postos de avituallamento para facilitar que os participantes estean perfectamente atendidos ao longo de toda andaina.
O percorrido establecido pola organización contempla un desnivel positivo de 860 metros para a distancia longa de 24 quilómetros, que terá tamén habilitados 3 avituallamentos. No caso do trazado medio, de 14 quilómetros, disporá de dous avituallamentos e no curto, de 8 quilómetros, un.
Para incentivar a inscrición neste evento deportivo e turístico, a organización estableceu varios sorteos de produtos doados por establecementos comerciais da contorna entre todos os dorsais inscritos, que tiveron que abonar 10 euros por participar en concepto de seguros, etc. 5 euros de cada inscrición irán destinados integramente á Fundación Andrea de apoio a nenos e nenas con enfermidades de longa duración, crónicas e terminais.
Ao remate deste evento turístico-deportivo a organización servirá un aperitivo a base de pinchos nos que haberá empanada, mexillóns e callos que poderán ser degustados e acompañados por bebidas refrescantes doadas polos establecementos colaboradores.
