Os asistentes recolleron follas de reclamación que serán presentadas ante o SERGAS para expresar a repulsa por unha situación de interinidade que se prolonga demasiado no tempo.
Unhas 200 persoas convocadas polas tres formacións políticas que conforman a Corporación Municipal (PPdeG, Porvir e PSdeG-PSOE) asistiron á concentración diante do Centro de Saúde para reclamar un médico de xeito estable en Campo Lameiro e poñer fin á interinidade de facultativos que leva prolongándose xa demasiado tempo.
Os concentrados despois de berrar varias consignas a prol da sanidade pública e de calidade recolleron as follas de reclamación repartidas polos membros da Corporación Municipal para que, unha vez cumprimentadas, se entreguen no Concello para que se fagan chegar ao SERGAS.
Os asistentes a esta concentración remataron o acto coa lectura dun manifesto a cargo do alcalde Carlos Costa, en nome da Corporación Municipal, no que se recolle que “os veciños consideramos que servizo de Atención Primaria de calidade ten que ofrecer, cando menos, unha continuidade no médico de cabeceira que nos atende, sobre todo ás persoas maiores que precisan dun seguemento e dun coñecemento das súas doenzas cunha perspectiva e durabilidade no tempo. Queremos unha continuidade e unha estabilidade na atención sanitaria en Campo Lameiro polo que instamos ao SERGAS e á Xunta de Galicia a que tomen as medidas necesarias para que non nos atenda un médico cada pouco sin que nos dea tempo casi nin a coñecelo”.
No escrito reivindicativo ínstase tamén ao Goberno de España a que amplíe o número de prazas para o MIR e que se diferencie, desde o principio, os médicos que prefiren a especialidade de Urxencias e os de Atención Primaria “para que se cubran canto antes todas as vacantes que existen no sistema sanitario galego e español. En definitiva, estamos hoxe aquí reivindicando novamente unha atención digna para os nosos veciños e veciñas. Non queremos ser tratados como si foramos veciños de terceira”.
O SÁBADO REPETIRASE A CONCENTRACIÓN DE PROTESTA
Asimiso, o alcalde anunciou en nome de toda a Corporación que seguirán as protestas en diferente formas para reivindicar unha estabilidade médica para Campo Lameiro, indicando que seguirán combinando as xestións ante as autoridades sanitarias e as mobilizacións ata que se resolva a falta de estabilidade e consolidación de médicos en Campo Lameiro e así, o vindeiro sábado 17 de decembro ás 18 horas, volverá realizarse unha nova concentración ante o Centro de Saúde.
