A localidade mosense recollerá en xuño o prestixioso galardón nacional que premia traballos que contribúen a aumentar a reciclaxe, a mellorar sustentabilidade e a limpeza urbana, a xestión de residuos, a diminución de emisións, e a sensibilización e comunicación ambientais; e ao que o Concello de Mos se presentou co proxecto CoidaMos
A alcaldesa de Mos, Nidia Arévalo, e a concelleira de Medio Ambiente mosense, Laura Méndez, informaron hoxe de que o Concello vén de recibir a boa nova de que é un dos gañadores do prestixioso premio nacional “Escoba de Plata”. A administración local mosense recollerá o galardón en Madrid na Feira Internacional TECMA, do 18 ao 20 de xuño.
A deste ano 2024 trátase da XIX edición do Concurso “Escobas de Plata” organizado por ATEGRUS, Membro Nacional de ISWA, que promove esta nova convocatorioa do concurso nas categorías de Prata, Ouro e Platino.
O concurso está dirixido a Municipios, Deputacións, Mancomunidades, empresas prestatarias de servizos, enxeñerías, consultorías, fabricantes de bens de equipo, instalacións para a xestión de residuos e aseo urbano, universidades, centros tecnolóxicos e de formación, etc.
A competición é un intento de valorar aquelas actuacións realizadas para mellorar a nosa contorna e apostar pola sustentabilidade, premiando os esforzos encamiñados a estimular os avances tecnolóxicos e de concienciación, que sirvan para mellorar a nosa calidade de vida e protexer o medioambiente.
O Concello de Mos presentouse á categoría “Escoba de Plata”, na que resultou vencedor polo seu “proxecto de reorganización dos servizos de limpeza e recollida, potenciando a prevención na xeración de residuos, a reutilización e a reciclaxe. Afianzando un compromiso da veciñanza coa limpeza, construíndo un municipio sostible desde o punto de vista ambiental, económico e social”. Tal e como esta mañá explicaban as representantes municipais Arévalo e Méndez Senlle.
Mos presentouse a concurso cun proxecto centrado en accións ambientais realizadas e que se están levando a cabo.
A participación neste concurso e este novo galardón veñen a ampliar e dar continuidade ás iniciativas enmarcadas na novidosa e pioneira campaña medioambiental mosense CoidaMos. Así, continúase a implementar a nova campaña municipal CoidaMos, por un Mos máis limpo. Campaña que, desde a súa presentación e posta en marcha en novembro do ano pasado, xa está a dar os seus froitos con resultados visibles e que se materializan tamén en recoñecementos como este premio “Escoba de Plata” e a Bandeira Azul para o Paseo do Louro.
Esta campaña CoidaMos céntrase na difusión da información dos servizos ao dispor dos veciños. Ten como obxectivo concienciar e informar á poboación.
O Concurso “Escobas” de Prata, Ouro e Platino
Celébrase dentro do marco de actividades de TECMA 2024 – Feira Internacional do Urbanismo e do Medio Ambiente, que terá lugar en IFEMA, Madrid, do 18 ao 20 de xuño.
O concurso celébrase dentro da iniciativa de ATEGRUS por apoiar, premiar e difundir o bo facer da xestión dos residuos e o aseo urbano, así como a elaboración de proxectos e o desenvolvemento de tecnoloxías que permitan unha xestión sostible da nosa contorna.
Este certame vén desenvolvéndose desde 1987, a primeira edición do certame foi convocada pola Unión Europea dentro do Ano Europeo de Medio e a súa organización en España foi encargada ao Membro Nacional da ISWA, ATEGRUS. As edicións seguintes tiveron lugar desde 1990 cunha periodicidade bienal.
Prémianse aqueles traballos que contribúan a aumentar a reciclaxe, a establecer mellores servizos de limpeza urbana, a realizar unha correcta xestión de residuos, a protexer a contorna, a diminuír as emisións, a realizar campañas de sensibilización e comunicación ambiental, a fomentar a sustentabilidade etc.
O Xurado está constituído por expertos de recoñecido prestixio nas materias obxecto deste certame. Os membros do xurado están obrigados a velar pola confidencialidade das votacións e as súas decisións son irrevogables.
