∙ Veciños e comerciantes levan anos avisando da progresiva deterioración desta zona, que no seu día albergaba os mellores comercios e locais de hostalería de Culleredo.
∙ A falta de limpeza e os malos cheiros que iso xera, á vez que a ausencia das tan reclamadas prazas de aparcamento no Burgo, son dous dos factores determinantes neste declive.
A que no seu día era considerada a zona máis dinámica e viva do Burgo, a das rúas Hersa e Sanjurjo de Carricarte, sofre a día de hoxe un abandono e unha deterioración que os veciños, e sobre todo os comerciantes e hostaleiros, sofren a diario.
Ao xa constante problema da falta de aparcamento público, agravado aínda máis coa eliminación de varias prazas coa reforma da Praza de Galicia, hai que sumarlle a sucidade, a falta de iluminación, a deterioración do mobiliario urbano e a falta total de apoio ao comercio local por parte do Goberno Municipal.
“Os veciños e comerciantes trasladáronnos en numerosas ocasións a falta de limpeza das rúas, de como a sucidade se acumula ata provocar cheiros insoportables e como o verdín cando chove fai perigoso o pasear por algunhas zonas”, sinala a concelleira popular, Vanesa Fernández.
Outro dos problemas que preocupan aos veciños das rúas peonís do Burgo é a deficiente iluminación pública. “É claramente insuficiente. Basta con darse unha volta durante a noite ou simplemente a última hora da tarde para darse conta de que é inaceptable que nunha zona tan concorrida súfrase desta falta de iluminación”, denuncia a edil popular.
Respecto ao apoio municipal a comerciantes da zona, aí os populares cargan aínda con máis dureza contra o labor do goberno que dirixe José Ramón Rioboo. “Nulo. O apoio ao comercio local é practicamente nulo. A falta de iniciativas por parte do alcalde para revitalizar esta e outras zonas comerciais de Culleredo é intolerable. Salvo algunha campaña menor en Nadal, o resto do ano cero. Nada”, sentencian desde o Grupo Popular.
