A gala terá lugar o 30 de xuño na Cidade da Cultura de Santiago de Compostela
Turismo de Galicia volve apostar por promover o turismo urbano a través da súa oferta gastronómica nunha campaña que culminará o 30 de xuño nunha gala na que sairá elixido o Mellor Cociñeiro de Tapas Sete Cidades, Sete Sabores 2026 e na que participará un cociñeiro por cada unha das cidades galegas.
Organizada pola Xunta de Galicia, na súa décima edición, a Gala Mellor Cociñeiro de Tapas Sete Cidades, Sete Sabores consolídase como un espazo de encontro entre a gastronomía urbana, o talento culinario e a identidade local. Ao mesmo tempo, constitúe unha iniciativa estratéxica para atraer un perfil de visitante que realiza escapadas ao longo de todo o ano na procura de experiencias gastronómicas auténticas, centradas na cociña de proximidade e na cultura asociada á alimentación.
Sete cociñeiros, un por cada cidade participante, dan forma a unha proposta colectiva que amosa a diversidade do tapeo galego desde distintas realidades urbanas.
Os chefs representantes de cada cidade son: Adrián Pérez de Sinxelo (Ferrol); Carlos Montes de La Sifonería Gastrobar (A Coruña); Rodrigo Seoane de ArteSana Gastrobar (Santiago de Compostela); Rubén González de El Cafetín de La Alameda (Pontevedra); Rebeca Guede de La Orensana (Vigo); Beatriz Alcalá de La zapatería del abuelo (Ourense) e Jose Luis Pardo de El Boni (Lugo).
Os sete cociñeiros competirán por dous galardóns e serán outorgados por un xurado profesional e outro popular, integrado polos invitados á gala, que utilizará un sistema de televotación. Todos eles valorarán cada tapa segundo a súa complexidade técnica, creatividade, presentación e sabor.
Propostas por cidade
FERROL. Tapa que concursará: Merenda do Patrón.
• Chef: Adrián Perez de Sinxelo. Naronés formado na Escola de Hostalería de Pontedeume, abriu hai sete anos as portas de Sinxelo en Ferrol tras o seu paso por cociñas de prestixio como a do restaurante O Camiño do Inglés. Non é novo nesta gala, xa que en 2024 obtivo o premio do público.
• Descrición da tapa: o cociñeiro recrea a esencia das festas patronais da súa infancia, onde o doce e o salgado se mesturaban sen orde na mesa familiar máis alá da sobremesa. A tapa condensa os elementos de carne asada, nunha base de masa doce de pataca tipo xuxo, e rechea de rabo de vaca galega estofado a baixa temperatura. O bocado complétase cunha cobertura de teriyaki de pementos de Piñeira e unha emulsión de cenoria ecolóxica. É unha homenaxe á identidade galega que fuxe do artificio visual para centrarse no produto local.
A CORUÑA. Tapa que concursará: Dry Caldini
• Chef: Carlos Montes de La Sifonería Gastrobar. Soubo que quería ser cociñeiro dende que, con apenas seis anos, preparaba tortillas francesas na súa casa de Chinchón. Tras un periplo por toda España, namorou da Coruña e fundou xunto a Silvia Munno a súa propia casa en 2022.
• Descrición da tapa: proposta audaz que xira arredor do concepto de trampa visual. A idea nace de aplicar a técnica do gazpacho transparente a un emblema galego: o caldo. Mediante unha complexa clarificación, obtén un elixir cristalino que se serve nunha copa de Martini. O bocado complétase cunha oliva feita de puré de grelos e algas, deseñada para que quen a degusta sinta o sabor tradicional do caldo de sempre pero coa sorpresa dunha estética sofisticada e contemporánea
OURENSE. Tapa que concursará: Apagón.
• Chef: Beatriz Alcalá de La zapatería del abuelo. Regresou a Ourense desde Barcelona para dar unha nova vida ao local familiar do seu avó no histórico Casco Vello e transformalo nun referente gastronómico.
• Descrición da tapa: Coa súa tapa Beatriz —celíaca e firme defensora da cociña inclusiva— presenta unha proposta apta para todos, cuxa idea naceu á luz das candeas durante o corte eléctrico. A peza centra o seu valor nun salmón fresco afumado artesanalmente no emblemático Fumeiro de Pepe “Callos”. Para equilibrar a graxa do peixe, incorpora unha manteiga de cítricos, herba luisa e menta da horta local de María de Atarazana, rematando o conxunto con aguacate e mango.
VIGO. Tapa que concursará: Orentako.
• Chef: Rebeca Guede de La Orensana. Rebeca Guede, ourensá de nacemento pero forxada profesionalmente nos fogóns dos mellores hoteis de Tenerife, regresou a Galicia para fundar en Vigo o seu proxecto máis persoal: La Orensana.
• Descrición da tapa: a cociñeira une as súas raíces e a súa traxectoria vital, fusionando o sabor do mar galego coa enerxía das Illas Canarias. A peza preséntase como un taco de millo azul que agocha un calamar da ría crocante sobre unha base de ali oli de mollo. O conxunto equilibrase cunha salsa acidificante e un toque fresco de lima, utilizando produtos de tempada da súa propia horta familiar.
PONTEVEDRA. Tapa que concursará: O Canto do galo.
• Chef: Rubén González de El Cafetín de la Alameda. Rubén repite a súa participación na gala representando a Pontevedra. A Rubén González a cociña vénlle no sangue. Naceu nunha familia de oficio hostaleiro e curtiuse en fogóns coma os do Parador de Baiona ou o Cenador de Salvador Gallego, en Madrid. Decidiu volver á cidade do Lérez e, xunto coa familia, converteu El Cafetín nun dos lugares de referencia para os foodies da cidade.
• Descrición da tapa: Fiel á súa filosofía de aproveitamento total, o cociñeiro presenta un tributo ao galo celta e unha viaxe polo ecosistema do animal: unha complexa royale coroada por unha espetada de peituga curada, acompañada de crocantes coa pel, brotes de chícharo e un intenso caldo. O bocado complétase cunha escuma de millo e aire de cebada, recreando a alimentación do galo en liberdade.
SANTIAGO DE COMPOSTELA. Tapa que concursará: Castelo da Rocha.
• Chef: Rodrigo Seoane de Artesana Gastrobar. Cunha sólida traxectoria de catorce anos en hoteis de cinco estrelas nas Baleares, regresou a Galicia para traballar con Lucía Freitas antes de converterse no xefe de cociña de ArteSana.
• Descrición da tapa: o cociñeiro rende homenaxe á fortaleza da súa vila natal e aos recordos da infancia. A proposta parte dun estofado tradicional de coello, cociñado amodo ata acadar unha textura melosa, que se presenta no formato contemporáneo dunha gyoza ao vapor. O bocado elévase cunha salsa reducida con notas cítricas de yuzu e follas de limón, unha escuma de charouvía e o toque vibrante das sete especias xaponesas.
LUGO. Tapa que concursará: Ostra, que pescada!
• Chef: Descubriu a súa paixón polos fogóns “de rebote”, pero a súa traxectoria en Lugo dende 1995 converteuno nun mestre do formato tapa e referente creativo da gastronomía da cidade.
• Descrición da tapa: A peza é unha trampa visual que simula unha ostra mediante unha coidada galleta de tinta de lura, pero que agocha no seu interior a excelencia da pescada de Burela de anzol. Cociñada ao baleiro para manter unha textura impecable, a pescada compleméntase cunha emulsión do seu propio coláxeno e un atrevido gazpacho de gilda. O resultado é un bocado efémero que condensa a forza do mar coa sofisticación técnica.
