- Destaca que o novo centro incorporará os últimos avances tecnolóxicos, con máis espazos e mellores condicións tanto para doentes como para os profesionais sanitarios
- Prevese que as novas instalacións estarán rematadas en 2027
- Desde 2009, a Xunta de Galicia construíu ou reformou un total de 136 centros de saúde, cun investimento superior aos 170 millóns de euros
O presidente da Xunta, Alfonso Rueda, acompañado polo conselleiro de Sanidade, Antonio Gómez Caamaño, asistiu hoxe ao inicio das obras do novo centro de saúde de Vilagarcía de Arousa e celebrou o reforzo da atención primaria galega.
Durante a súa intervención no acto, Rueda sinalou que a sanidade é “o servizo público máis importante” ao que se lle está dedicando “toda a atención” e esforzos. Neste sentido, o titular do Goberno galego reivindicou o compromiso da Xunta de Galicia coa atención primaria en todo o territorio para que os galegos conten cunha sanidade de calidade, e destacou que o novo centro incorporará os últimos avances tecnolóxicos, con máis espazos e mellores condicións tanto para doentes como para os profesionais sanitarios.
O novo centro de saúde de Vilagarcía de Arousa, por un importe de 19 millóns de euros, estará rematado, segundo as estimacións, en 2027. Contará cunha superficie de máis de 8.000m2, que incluirá unha área de adultos con 17 consultas de medicina de familia, 17 de enfermería, sala de toma de mostras, 4 salas de técnicas, 3 polivalentes, 5 de docencia, sala de illamento e consulta de traballador social. Tamén haberá unha área pediátrica con 5 consultas e 5 de enfermería, unha área da muller con 3 consultas e o novo PAC contará con 9 espazos asistenciais.
Dende o ano 2009, a Xunta de Galicia construíu ou reformou un total de 136 centros de saúde, cunha superficie superior aos 90.500m2. En total, a Administración autonómica investiu neste período máis de 170 millóns de euros en infraestruturas de atención primaria.
