O Grupo Municipal de Cambados levará tamén esta iniciativa ao pleno, dada a relevancia da obra do escultor cambadés.
A deputada do BNG, Montse Prado, rexistrou varias iniciativas para que o Goberno galego faga todas as actuacións precisas para adquirir a obra “A Santa” do escultor cambadés, Francisco Asorey.
O escultor cambadés Francisco Asorey é un dos grandes artistas galegos do século XX. Dotado dunha grande diversidade creativa, ao longo da súa traxectoria artística enlazou a tradición material e formal con elementos dos movementos artísticos das vangardas da súa época. Na súa obra podemos atopar expresións e pegadas do postimpresionismo, o expresionismo, o postcubismo…, pero o máis persoal da mesma é a mestura entre o realismo primitivo (con fondas raíces na arte románica e barroco) e o expresionismo humanista, do que xurdiron as súas obras máis representativas, nas que captou e expresou, coma ninguén, a imaxe e o sentimento da Galiza do seu tempo. Foi quen de captar a esencia da galeguidade e transportala fóra das nosas fronteiras.
A Santa foi adquirida en 1951 pola Casa de Galiza de Montevideo, un dos principais centros da emigración galega a aquela altura, para colocar na súa sede principal.
Dada a difícil situación na que se atopa esta entidade, intervida, inmersa nun concurso de acredores a causa do volume de débeda acumulada e onde se está facendo inventario das súas posesións para facer fronte a esta débeda.
A relevancia da obra do escultor, fai que desde o BNG se pida ao Goberno galego a realizar os máximos esforzos para que A Santa pase a formar parte do patrimonio público de Galiza e non sexa subastada e caer en mans de particulares.
Desde o Grupo Municipal do BNG levarase a través de moción esta iniciativa ao vindeiro pleno.