O concelleiro do Partido Popular e encargado da área de Urbanismo, Pablo Fernández, repasou máis de vinte obras e proxectos municipais que non cumpren cos prazos e esixiu ao alcalde que depure responsabilidades
Fernández presidirá unha das catro vicesecretarias que puxo en marcha o PP, en concreto, a de desenvolvemento territorial. Desde a mesma, entre outras funcións, fiscalizarase e analizará o estado das obras no municipio
O concelleiro do Partido Popular de Pontevedra e encargado da área de Urbanismo, Pablo Fernández, repasou este venres o estado das obras e proxectos municipais que están a ser executados ou de recente finalización. Todos teñen dúas cousas en común: “atrasos e sobrecustos”. “Consideramos que a falta de control, de seguimento e de traballo por parte do Concello resultou en que a práctica totalidade das obras que están a levar a cabo acumulen atrasos, desfasamentos económicos e erros técnicos”, detallou o popular.
Fernández explicou que a falta de material non afecta tanto á obra civil, xa que a maior parte dos produtos requiridos son nacionais. De feito, e como exemplo, o concelleiro referiuse á obra do Gran Montecelo, que a pesar das “escusas que pon este Concello para as súas obras, vemos como outros proxectos avanzan a bo ritmo e cumpren os prazos”.
Fernández comezou referíndose ás rúas Loureiro Crespo e Ou Castañal, que deron inicio en maio do 2020, cun prazo de execución dun ano e cun orzamento de 2,1 millóns de euros. “Xa van catro prorrogas, acumulando 18 meses de atraso e cun sobrecusto do 20%. Inaugurouse o 26 de novembro sen que a obra estivese finalizada”.
O Parque de Bombeiros tiña un prazo de execución de catro meses, cun orzamento de medio millón de euros. “Aprobáronse dúas prórrogas, a obra tivo sobrecustos na execución, a cal se partiu en tres contratos”, explicou.
Nesta liña, Fernández fixo referencia a outras catro prórrogas aprobadas recentemente: as reformas do edificio Centro Sur, prorrogada catro meses máis, a reforma do CIM, prorrogada dous meses, a renovación da iluminación de Marcón e Mourente, prorrogada dous meses, a renovación da iluminación de Verducido, Santa María e San adres de Xeve, prorrogada dous meses.
Dous campos de futbol tamén figuran na lista: o Manolo Barreiro, pechado en dúas ocasións a metade de tempada para arranxar o céspede e sen ningún tipo de previsión e sen diálogo por parte do Concello cos usuarios, e recinto deportivo en Pontesampaio, que sufriu varias prorrogas e sobrecustos, ademais de modificacións do proxecto e a renuncia da empresa adxudicataria.
Os proxectos que mencionou Fernández foron a planta de compostaxe da Canicouva, “levamos pagando este terreo desde 2015 e aínda non se moveu unha pedra”, o concurso para destapar o Gafos, “anunciado en 2020 e licitado en 2022”, a praza de Barcelos, “anunciada no 2020, cun proxecto do 2021 e en 2022 preséntannos unha nova reforma do vial perimetral e dinnos que a obra agora faia a Deputación”, ou o skatepark de Raíña Vitoria.
Monte Porreiro tamén foi tratado polo concelleiro, “un barrio que se opuxo a un proxecto que non tiña sentido e que terminou por mobilizar á veciñanza”. “Prometéuselles diálogo e creouse unha enquisa cidadá da cal non volvemos a saber nada”. E o que para o edil é a “guinda”, o campo de futbol de Salcedo, cuxos terreos recibiu o Concello en 2020, anuncio o seu inicio en 2021 cun prazo de 10 meses e agora acábanse de dar conta que non hai subministración eléctrica na zona”.
Ademais, Fernández fixo referencia á resolución de contratos por obras polo concurso de acredores da empresa Acevi, que afecta á ampliación do cemiterio de San Amaro e á actuación de mellora no Teatro Principal. Outro punto que destacou foi a obra no cruzamento de Benito Corbal, “arranxado catro veces e na última reforma acumuláronse atrasos ata en dúas ocasións”.
Por último, Fernández lembrou que a concellería de Movilidad e Obras perdeu máis de seis millóns de euros dos fondos Next Generation ao non solicitar os mesmos, sendo a única capital española en non facelo.
