A Biblioteca de Pazos de Borbén recibe o premio Maria Moliner de Animación a lectura

- Anuncio -

É o segundo ano consecutivo que o centro recibe esta distinción
A Biblioteca Municipal “Bibliopazos” de Pazos de Borbén, co seu proxecto “Pazos tamén conta en Igualdade” acaba de recibir o prestixioso premio María Moliner outorgado polo Ministerio de Cultura. O galardón premia ao mellor programa de animación á lectura en municipios cunha poboación de menos de 50.000 habitantes e ten como obxectivo o incentivar e promocionar a afección pola lectura nos pequenos concellos e lugares nos que habitualmente existe un difícil acceso ao mundo do libro.
O premio está dotado cun premio en metálico de 2.777,77 euros destinados á compra de libros para a biblioteca, axudando así a que aumente o patrimonio cultural da institución para poder ofrecer aos veciños do municipio o maior abanico de obras posible.
O alcalde de Pazos de Borbén, Andrés Iglesias, destacou que esta é a cuarta vez que a biblioteca recibe este galardón, a segunda de forma consecutiva. “Para o Concello é unha prioridade a función que realiza a biblioteca, contribuíndo a facer do noso municipio un lugar que se caracteriza pola súa calidade de vida e o seu apoio á cultura. Temos claro que o coñecemento é a ferramenta fundamental para o desenvolvemento de calquera persoa, independentemente da súa idade, polo que estas iniciativas sempre reciben o máximo apoio posible da corporación municipal”, finalizou o edil.