• Haberá tamén actuacións de agrupacións folclóricas e pechará este evento gastronómico o Bruxo do Río cunha queimada de balde
O alcalde en fucións de Cerdedo-Cotobade, Fernando Vázquez, xunto co concelleiro de Tenorio, Pepe Pichel, e os directivos da Asociación Cultural Foula, Miguel Fraguas e Sagrario Pérez, presentou a VIII Festa do Pan de Millo e Ovo de Cotobade que terá lugar o vindeiro sábado 17 de setembro no campo da festa de Tenorio.
Este evento gastronómico organizado pola Asociación Cultural Foula e que conta coa colaboración do Concello de Cerdedo-Cotobade, volve a celebrarse despois dos parón obrigado pola pandemia da Covid-19 coa intención de despachar máis dun milleiro de ovos fritidos con pan de millo desmigado para servir durante toda a xornada aos comensais que ata alí se acheguen.
Ademais do atractivo gastronómico desta festa que chega á súa oitava edición, tamén manterá o seu interese desde un punto de vista musical e folclórico coa participación de importantes agrupacións que animarán o certame durante toda a xornada.
ACTUACIÓNS MUSICAIS DURANTE TODA A XORNADA
Así, ás 13 horas intervirán coa súa música os Gaiteiros das Rías Baixas, ás 15 horas tomarán o relevo as Pandereteiras do Val de Quireza, mentras que ás 16 horas tocaralle á Banda de Música de Tenorio.
Ás 18 horas terá lugar a sesión infantil con Magín Blanco e ás 20 horas actuará Metalxis. Unha hora máis tarde, ás 21 horas, tocaralle o turno a Os D`Arbo e pechará a xornada festiva o Bruxo do Río facendo unha queimada de balde.
O alcalde en funcións do Concello de Cerdedo-Cotobade, Fernando Vázquez, felicitou á Asociación Cultural Foula por recuperar esta iniciativa gastronómica que acada xa a súa oitava edición e por contribuir con esta actividade á dinamización sociocultural e musical en Tenorio e de todo o concello. Ademais o rexedor agradeceu os esforzos que realiza este colectivo para manter activo o acervo cultural e folclórico no municipio.