Impartirase de forma presencial o vindeiro mércores, 5 de outubro, no local social de Santaia de Probaos en horario de mañá e tarde
A Axencia Galega da Calidade Alimentaria, dependente da Consellería do Medio Rural, ten previsto celebrar o vindeiro mércores, 5 de outubro, un curso sobre o benestar animal e a contaminación eléctrica nas instalacións gandeiras. Esta formación será presencial e celebrarase en horario de mañá e tarde (de 10,00 h. a 14,00 horas e de 15,30 h. a 18,30 horas) no local social de Santaia de Probaos.
A Axencia Galega da Calidade Alimentaria, a través da formación non regrada e dentro do Plan de formación continua 2022, ten como obxectivo concienciar aos asistentes sobre o efecto da electricidade no benestar e produtividade dos animais. Neste senso, daranse unhas pautas sobre o uso de medidores e o seu diagnóstico, co fin de mostrar a existencia e evidenciar fontes de correntes eléctricas non desexadas nas instalacións.
O curso está dirixido á xuventude do medio rural galego, así como ás persoas vinculadas profesionalmente, ou con expectativa de incorporación, aos sectores produtivos gandeiros, agrarios, agroalimentarios e de cadea forestal-madeira.
Cómpre lembrar que a Consellería do Medio Rural conta cun plan de accións formativas e de transferencia para este ano 2022 que pode consultarse no seguinte enlace: https://ovmediorural.xunta.gal/gl/consultas-publicas/accions-formativas. Precisamente nesta páxina pode atoparse o curso referido e facer a preinscrición en liña cubrindo os datos necesarios. O coordinador porase en contacto coas persoas interesadas a través do correo electrónico comunicándolle se están ou non admitidas. Para consultar calquera dúbida, pode chamarse ao teléfono 881 960 207, ou enviarse un correo a oac.seca.betanzos@xunta.es.
