O alumnado de 3ºESO do IES Chano Piñeiro de Forcarei resultou o equipo galego gañador do concurso de resolución de problemas Matemáticas na Raia 2023, organizado pola Asociación Galega do Profesorado de Educación Matemática (AGAPEMA)[1] xunto coa Associação de Professores de Matemática (APM)[2] de Portugal.
A proba, na que participou alumnado de 3ºESO de toda Galicia, céntrase no fomento do traballo colaborativo e celebrouse o día 23 de marzo. Consistiu na resolución de cinco problemas cun tempo límite de 90 minutos e estes mesmos problemas tamén foron resoltos asemade polo alumnado participante en Portugal. O grupo gañador de cada país recibe como premio unha estadía en Tui con todos os gastos pagados na última fin de semana de maio para participar nun Encontro Matemático dedicado a actividades lúdico-festivas no que o alumnado portugués e galego confraternizará durante estas dúas xornadas realizando visitas turísticas e competicións amistosas.