Ante as novas publicadas sobre a existencia dunha condena por violencia machista ao candidato do PP á alcaldía da Illa de Arousa, o BNG do Salnés quere manifestar:
- A violencia machista é unha lacra que non cesa na nosa sociedade, provocando un continuo regueiro de casos de agresións e mortes.
- Consideramos completamente indigno e inadmisible que alguén condenado por exercer a violencia machista poida facer parte dunha lista eleitoral, incumprindo os mínimos estándares éticos e de exemplaridade esixibles para ostentar un cargo público de representación.
- Consideramos o comunicado do PP, a este respecto, insuficiente. Non abonda con anunciar que, de saír electo, o candidato non integraría o grupo municipal do PP, podendo producirse o esperpento de que outro hipotético candidato a alcalde polo PP no pleno recibise o apoio da persoa en cuestión.
- Correspóndelle ao PP, quen provocou esta situación, poñer todos os medios necesarios para corrixir esta intolerable situación.