O torneo celebrarase, na tarde deste sábado 3, no colexio Maristas de Ourense, e reunirá un total de 270 xogadores de todas as idades, desde os nacidos despois de 2015 até os sénior.
A dirección técnica da proba corresponderalles aos clubs Maristas e Xadrez Ourense, e competirase polo sistema suízo, a seis roldas.
O salón de plenos do Concello de Ourense acolleu esta mañá a presentación da XVI Copa Galicia de Xadrez Escolar, I Memorial Emilio Rodríguez, en homenaxe ao finado profesor do colexio Maristas. É o propio colexio o encargado de organizar o torneo, que se celebrará no seu pavillón polideportivo desde as 16.15 até as 21.00 horas deste sábado, 3 de xuño, coa participación de 270 xogadores de todas as idades: desde os máis cativos, os nacidos despois de 2015 –categoría Sub8- até os da categoría Sénior, cuxa participación se abre por vez primeira na honra do profesor falecido.
A presentación contou coa presenza do tenente de alcalde en funcións, Armando Ojea, do delegado de Deportes da Xunta de Galicia, Manuel Pérez, así como de representantes dos clubs organizadores: Elías González, Roberto Baltar e Manuel Vidal.
O modelo de competición será o sistema suízo a seis roldas -15 minutos por xogador para cada partida nas categorías de formación, e 10 minutos máis 3 segundos de bonificación por xogada para os sénior-, segundo establece a dirección técnica da proba, a cargo dos clubs Xadrez Ourense e Maristas Ourense.
Ademais dos premios correspondentes, a Copa Galicia entregará trofeos conmemorativos a todas as persoas participantes e realizará sorteos de material escolar, deportivo e gastronómico.
