• A través destes galardóns recoñécese o labor realizado á hora de impulsar iniciativas que facilitan que a xente de todas as idades poida facer uso e familiarizarse coas novas tecnoloxías
• O alcalde, Manuel Campos, incide na importancia que ten este servizo no concello, no que leva 10 anos operativo, tempo no que contou con máis de 5.400 usuarios e usuarias, nas máis de 1.000 actividades desenvoltas
O axente TIC responsable da Aula CeMIT e administrador da Aula Mentor de Cuntis, Víctor Manuel Galdo, foi un dos gañadores da primeira edición dos Premios Axentes TIC da Rede CeMIT de Galicia. O responsable das dependencias cuntienses levouse o segundo galardón na categoría Máster, na que se recoñecía a importancia daquelas propostas máis orixinais e creativas. O labor de Víctor Manuel destacou entre as preto de 100 aulas CeMIT que están operativas actualmente en Galicia. Entre as propostas presentadas para incurrir a estes premios figuraban iniciativas nas que se empregaron algún complementos tecnolóxicos punteiros, como lentes de realidade virtual, drons, kits de robótica ou impresoras 3D.
O alcalde, Manuel Campos, trasladou os seus parabéns ao responsable da aula non só por este éxito tan importante, senón tamén polo traballo que vén desenvolvendo desde que as instalacións se puxeron en marcha no ano 2014. Ao longo desta década foron máis de 5.400 usuarios e usuarias as que fixeron uso das instalacións, ben fose a través das horas de uso aberto ou participando nas máis de 1.000 actividades que se impulsaron, entre cursos, charlas e outras acción formativas, así como exames. En total, a Aula CeMIT ofreceu xa unhas 6.000 horas de formación gratuíta.
Tanto o Concello como o axente TIC amosan o seu agradecemento por este recoñecemento, así como o interese por parte da veciñanza de Cuntis, desde as crianzas ata as persoas maiores, naies e pais que “participan de xeito habitual nas actividades que desenvolvemos na Aula CeMIT”, xa que “grazas a elas as iniciativas que se levan a cabo cobran un sentido, ademais de seren as responsables de motivarnos diariamente para continuar mellorando”.
Para consultar a oferta de cursos, solicitar o uso das dependencias ou tramitar calquera outra dúbida, a veciñanza pódese poñer en contacto co responsable deste servizo chamando ao 683147165 ou ben enviar un correo electrónico á dirección cemit.cuntis@xunta.gal. A Aula CeMIT está aberta os lunes e mércores, de 10.00 a 14.00 horas polas mañás e de 16.00 a 20.00 horas polas tardes, e os sábados de 10.00 a 14.00 horas. Con respecto á Aula Mentor, permanece operativa os martes e xoves, de 9.30 a 14.30 horas.
