Cun orzamento de 325.000 euros, pódense pedir até o 18 de agosto
O Concello de Ourense convoca un ano máis as axudas que darán apoio ás asociacións e entidades sen fin de lucro que realicen actividades de interese ou promoción social na cidade.
A convocatoria conta cun orzamento de 325.000 euros e os colectivos interesados disporán dun prazo dun mes para presentar as súas solicitudes. O prazo estará aberto até o día 18 de agosto, incluído.
O obxecto da convocatoria, en réxime de concorrencia competitiva, é conceder subvencións para financiar programas, proxectos o actividades no ámbito dos servizos sociais que sexan considerados de interese, promoción social ou de utilidade pública, que promovan as asociacións e entidades sen ánimo de lucro. Estes programas, proxectos ou actividades deberán ir dirixidos prioritariamente a persoas e colectivos en situación de vulnerabilidade.
Toda a información, as bases e a tramitación está dispoñible na páxina web e na sede electrónica do Concello. O extracto da convocatoria pódese consultar tamén no Boletín Oficial da Provincia número 134, do martes, 15 de xullo.
