Francisco Diéguez: ‘’Cando o Concello non ofrece información suficiente nin facilita a transparencia que require a xestión dos recursos públicos, temos a obriga de acudir ás instancias competentes. Falamos dun contrato vinculado a fondos europeos e a cidadanía ten dereito a saber como se emprega o seu diñeiro e que controis se realizan’’
A formación solicita que se investiguen as posibles irregularidades na contratación e o control dos fondos europeos vinculados ao proxecto municipal.
Avante Ourense presentou unha comunicación ante a Fiscalía Europea para poñer en coñecemento posibles irregularidades relacionadas co contrato de implantación do sistema de control de tráfico da Zona de Baixas Emisións (ZBE) de Ourense.
A formación explica que esta decisión chega ante a falta de información pública e de explicacións suficientes por parte do Concello sobre as cuestións formuladas arredor deste contrato. Ante a ausencia de transparencia e as dificultades para acceder á documentación necesaria para esclarecer os feitos, Avante Ourense decidiu acudir ao organismo europeo competente para solicitar que se examinen as circunstancias do procedemento.
A organización pide que se comprobe a existencia e o contido dos informes de fiscalización, o cumprimento dos procedementos de control do gasto público e a correcta aplicación dos fondos europeos NextGenerationEU vinculados ao proxecto.
Avante Ourense considera necesario que se recade toda a documentación administrativa, económica e técnica do expediente e que se determine se existen indicios de irregularidades que poidan afectar os intereses financeiros da Unión Europea.
A comunicación solicita tamén que se examine a actuación dos responsables públicos que interviñeron no procedemento, incluído o alcalde, así como a da empresa adxudicataria, SICE, para esclarecer a súa posible participación, se a houbese, nos feitos que se deben investigar.
Desde Avante Ourense subliñan que esta iniciativa non presupón a comisión de ningún delito, senón que pretende que os organismos competentes dispoñan da documentación necesaria para aclarar os feitos e determinar se existen responsabilidades.
Avante Ourense reclama transparencia, fiscalización efectiva e explicacións claras sobre a tramitación do contrato. A organización considera que a xestión dos fondos públicos debe estar sometida a todas as garantías e que calquera posible irregularidade debe esclarecerse con todas as garantías legais.
