Analizaron como mellorar o autosellado das credenciais e como axilizar a recepción da Compostela, sobre todo en peregrinacións en grupo
A presidenta da Asociación de Municipios do Camiño da Ría de Muros Noia, Teresa Villaverde, acompañada do técnico Sebastián Valverde e do párroco de Noia, Don José Ortoño Fuentes, reuníronse co equipo de delegados designados polo Cabildo da Catedral de Santiago para a xestión das peregrinacións, Daniel Lorenzo e Noelia Márquez.
A reunión foi solicitada para tratar diferentes aspectos operativos e de organización sobre o Camiño da Ría de Muros Noia. O primeiro tema a estudar foi o do procedemento de autosellado para a credencial, que se realiza en formato papel e xa está presente nese roteiro xacobeo, pero que necesita algunhas adaptacións para desenvolver e facilitar a súa implantación.
A continuación analizáronse as peregrinacións colectivas, moi destacadas na Ría de Muros Noia, sobre todo as marítimas. Unhas peregrinacións que, tal e como explicaron os responsables da Oficina do Peregrino, deberán seguir os modelos implementados desde hai anos para os grupos. Un sistema que axiliza a obtención da Compostela e garante que todos os membros do grupo póidana recibir de modo áxil e cómodo.
Continuando coas peregrinacións marítimas, unha variante de especial importancia no Camiño da Ría de Muros Noia, os delegados do Cabildo da Catedral de Santiago confirmaron que o criterio para a recepción da Compostela é navegar 90 millas náuticas como distancia mínima, tal e como figura na credencial que emite a Catedral para acreditar as distintas etapas. Unha navegación que deberá realizarse en embarcacións a vela.
Agradecemento polo apoio
Durante a reunión, Teresa Villaverde agradeceu a Daniel Lorenzo o recoñecemento, o amparo e o apoio recibido tanto por parte do Arcebispo, como da Catedral de Santiago de Compostela e dos responsables da Oficina do Peregrino, “que desde que recibiron o estudo de historicidade do Camiño mostraron o seu interese por este roteiro e ofrecéronnos a súa colaboración”.
O encontro, celebrado en Santiago de Compostela, transcorreu coa máxima cordialidade e finalizou co desexo expresado por Teresa Villaverde para que o Camiño da Ría de Muros Noia reciba pronto tamén o respaldo oficial da Xunta de Galicia. Os responsables do Centro Internacional de Acollida ao Peregrino animaron á Asociación para que os seus traballos produzan os froitos que desexan.
A Asociación de Municipios do Camiño da Ría de Muros Noia está composta por Ames, Brión, Lousame, Muros, Noia, Outes, Porto do Son, Rois e Santiago.
