Representantes dos traballadores da Residencia Asistida de Maiores de Oleiros, de titularidade da Xunta de Galicia, reuníronse co alcalde Ángel García Seoane para trasladar diversas deficiencias que se están a dar no centro e na atención ás persoas maiores. O Concello reclamará á Xunta a súa inmediata subsanación para a mellora deste servizo público.
Segundo os traballadores, existe unha importante falta de persoal, especialmente en enfermería e limpeza. Tamén alertan de que se está a mesturar persoas con problemas psiquiátricos con grandes dependentes. Por outro lado, a nivel material, o edificio presenta un importante deterioro.
“É unha residencia pública no noso municipio e nós temos tanto interese como os traballadores en que iso funcione á perfección. Por iso, reclamaremos á Xunta de Galicia o que me expuxeron para que se lle poña unha solución o antes posible”, comentou o alcalde.
