Un convenio asinado pola Consellería de Política Social e Igualdade e COGAMI colabora no desenvolvemento de programas de atención a persoas con discapacidade e familias, ademais de prestar apoio ao mantemento da propia Confederación como das súas 58 entidades membro.
Cunha financiación que ascende a 993.312,00 €, a través deste programa denominado APDF, desenvólvense servizos que contribúen a mellorar a calidade de vida e autonomía de preto de 30.000 persoas con discapacidade e familias. Un destes servizos é o de información, asesoramento e orientación que ofrece información sobre temas de interese para o colectivo como son a accesibilidade, produtos de apoio, prestacións e axudas económicas, educación, lexislación e formación, entre outras.
Este convenio tamén contempla a promoción da autonomía persoal orientada á prevención da dependencia a través do fomento da saúde coa práctica de exercicios terapéuticos e rehabilitadores como a ximnasia, natación e fisioterapia. No que respecta á intervención social, hai unha especial incidencia na muller con discapacidade embarazada e lactante e nas persoas con grande discapacidade.
A través do convenio APDF tamén se potencia a formación e intermediación laboral para mellorar a cualificación profesional e académica, contemplando a realización de cursos de formación básica e obradoiros que se combinarán con accións encamiñadas a potenciar o acceso ao mercado laboral.
É importante sensibilizar e concienciar sobre a discapacidade, tanto ás persoas que a teñen como ás súas familias e ao resto da sociedade. Neste convenio inclúense charlas de prevención de lesión medular, xornadas de sensibilización e concienciación coa discapacidade, así como aspectos psicosociais da discapacidade.
O fomento do voluntariado, a programación e desenvolvemento de actividades de lecer para fomentar a participación social das persoas con discapacidade e tamén para apoiar o movemento asociativo para que poidan levar adiante os seus fins, son outros dos programas que se financian a través deste convenio.
