Cada un destes clubs, de todo tipo de disciplinas deportivas recibe un máximo de 3.000 euros para financiar diferentes gastos
O presidente da Deputación de Pontevedra, Luis López, confirmou que a Xunta de Goberno da institución provincial deu luz verde ao reparto de máis de 80.000 euros entre 69 clubs deportivos de 12 concellos da contorna do Salnés e Arousa que participan en competicións federadas de ámbito inferior ao estatal. “Somos a provincia do deporte, e para seguir séndoo temos a obriga de apoiar aos noso deportistas e clubs, que levan con orgullo o nome da nosa provincia alá onde compiten”, asegurou López.
Cada un destes clubs recibe un máximo de 3.000 euros e son de todo tipo de disciplinas deportivas: fútbol, balonmán, ciclismo, padel, rugby, artes marciais, atletismo, montañismo, caza, esgrima, boxeo ou, entre outros, patinaxe. As axudas permitiranlle sufragar gastos federativos, de competición e adestramento, de persoal, de material deportivo ou gastos sanitarios. En total, no conxunto da provincia distribuíronse un total de 600.000 euros.
No que respecta á contorna do Salnés e Arousa, tres clubs da Illa recibirán un total de 3.277 €, oito de Cambados 9.568 €, un de Catoira 639 €, tres de Meaño 2.577 €, catro de Meis 5.023 €, 11 do Grove 11.546 €, tres de Pontecesures 4.077 €, un de Ribadumia 1.565 €, 11 de Sanxenxo 14.450 €, dous de Valga 2.473 €, 17 de Vilagarcía 22.472 € e cinco de Vilanova de Arousa 6.144 €.
