“As que limpan” representarase no Auditorio de Ribadumia ás 19:00 horas e “Bernarda” no Auditorio da Grove a partir das 19:30 horas. Ambas funcións teñen entrada libre ata completar o aforo
O ciclo da Deputación “Tornar ás táboas”, co que a institución provincial está a espallar o teatro por toda a provincia nestes últimos meses do ano, chega este domingo 26 de novembro a Ribadumia e O Grove. “As que limpan”, a cargo da compañía A Panadaría, dará comezo ás 19:00 horas no Auditorio de Ribadumia e “Bernarda”, da man de Malasombra, representarase ás 19.30 horas no Auditorio do Grove. Ambas funcións teñen entrada libre ata completar o aforo.
En forma de sátira utópica, “As que limpan” está inspirada nas loitas organizadas polas camareiras de piso dos hoteis por conseguir dereitos sociais e laborais xustos. A obra da compañía A Panadaría goza de sete premios dende que se estreou en febreiro de 2022, entre os cales se atopa o María Casares ao mellor espectáculo en 2023.
“Bernarda”, ambientada nun pobo galego en 1975, aborda a vida dunha familia que vive un estrito loito de dous anos imposto por Bernarda tralo falecemento do seu marido no mesmo día da morte de Franco. A obra amosa o contraste de dúas realidades, mentres que no fogar familiar a vida da nai e das súas fillas desenvólvese en reclusión, a sociedade no exterior sofre fortes cambios.
Co ciclo teatral “Tornar ás Táboas” a Deputación de Pontevedra está a achegar neste último trimestre do ano un total de 49 funcións gratuítas e dirixidas a todos os públicos a outros tantos concellos da provincia de menos de 20.000 habitantes, coa participación de trinta compañías galegas que ofrecerán unha ampla variedade de espectáculos.