Na súa sesión desta mañá, tratou 5 asuntos que serán incluídos na orde do día do vindeiro Pleno do Concello
A Comisión de Pleno do Concello de Ourense, en sesión ordinaria celebrada esta mañá, abordou 5 asuntos que serán incluídos na orde do día do vindeiro pleno do Concello. Entre eles, ditaminou favorablemente dous expedientes de modificación de crédito (2M e 3M) do Consello Municipal de Deportes do Concello de Ourense, que destinarán a diferentes proxectos de gasto un total de 805.428,61 euros procedentes do remanente de tesourería.
O expediente de modificación orzamentaria 2M/CMD/2024 destina 122.178,61 euros a partidas de subministración de enerxía eléctrica e gas. O expediente 3M/CMD/2024 dedica 683.250 euros a diferentes gastos, entre os que salientan a reforma do campo de fútbol de Palmés, por un importe de 600.000 euros e a reforma das bancadas do campo de fútbol de Oira, por un importe de 20.250 €. Tamén se empregarán 20.000 euros para equipamento deportivo, outros 20.000 para a mellora de instalacións deportivas, 13.000 para mobiliario, 8.000 para maquinaria, instalacións técnicas e ferramentas e 2.000 para equipamento informático. Nos dous casos, os expedientes de modificación orzamentaria presentaranse ante o Pleno do Concello para a súa aprobación provisional.
Tamén se ditaminaron favorablemente e se presentarán ante o Pleno do Concello o expediente de recoñecemento extraxudicial de créditos 4/2024 do CMD, relativo a gastos de gas e electricidade, e un expediente de actualización do Inventario Municipal de Bens do Concello. Finalmente, o vindeiro pleno tamén tratará o recurso de reposición interposto pola sección sindical de Comisións Obreiras á aprobación definitiva da modificación número 1 da ordenanza municipal reguladora do teletraballo no Concello de Ourense e no Consello Municipal de Deportes.
