Café Quijano incorpórase ao programa das Festas de Ourense 2026, cun concerto mañá venres, 19 de xuño, de 22.30 horas a 00.00 horas, no exterior do Pavillón Municipal dos Remedios, con entrada libre e gratuíta.
A actividade musical continuará a partir das 00.00 horas coa actuación da orquestra América, ata as 03.00 horas na Praza de Concepción Arenal.
Café Quijano é un dos grupos máis singulares e recoñecibles da música española contemporánea. Nado en León e formado polos irmáns Manuel, Óscar e Raúl Quijano, o trío xurdiu en 1997 cun estilo propio que mestura o pop latino máis sofisticado, o rock, a sensualidade do bolero e os sons hispanoamericanos.
Cun prestixio internacional avalado por máis de 25 anos de historia e colaboracións con grandes artistas da talla de Celine Dion, Carlos Santana ou Joaquín Sabina, a banda desenvolve actualmente o seu “Miami 1990” Tour 2026. Esta xira preséntase como un espectáculo elegante, intenso e próximo; un paseo musical polos recordos que sinalaron o punto de partida da viaxe máis incrible dos tres irmáns, conectando as cancións do seu novo álbum coa enerxía do rock latino e os grandes éxitos que marcaron a varias xeracións.
