Hoxe, a militancia de Podemos Ourense mostrou o seu firme compromiso coa defensa dos servizos públicos ao apoiar a mesa PROCAPD na mobilización convocada fronte á Casa do Chocolate. Nun acto marcado pola unidade e a determinación, todas as presentes berramos alto e claro que a cidadanía ourensá, e especialmente as familias afectadas, non permitirán que se faga negocio cos seus fillos e fillas.
O Portavoz Provincial, Víctor Ferreiro, afirmou o seguinte: ‘’Reclamamos unha xestión directa e pública do Centro para Persoas con Discapacidade (CAPD), un servizo esencial que debería ser unha prioridade indiscutible para a Xunta de Galicia. A decisión anunciada pola Conselleira de Política Social, Fabiola García, de ceder a xestión a unha “asociación sen ánimo de lucro” non é máis que outro intento de desmantelar a responsabilidade pública e abrir a porta á privatización encuberta, un modelo que pon en risco a calidade do servizo e a dignidade das persoas usuarias’’
Asimesmo o Portavoz do Círculo, Francisco Diéguez, afirmou que ‘’a loita pola xestión pública é unha loita polos dereitos fundamentais. Estamos aquí para dicir que non aceptaremos que o CAPD sexa tratado como unha mercadoría ou unha oportunidade de negocio. Falamos dun recurso esencial para as persoas con discapacidade e as súas familias, que require unha planificación baseada no interese público e non na rendibilidade económica’’.
É imprescindible que a Xunta de Galicia rectifique esta decisión e tome medidas que aseguren unha atención pública, directa e de calidade, coa dotación de recursos necesarios para cubrir as necesidades reais das persoas usuarias. O modelo público non só é garantía de transparencia, senón tamén de igualdade e acceso universal.
Desde Podemos Ourense queremos subliñar que esta non é só unha batalla das familias afectadas, senón de toda a sociedade. A defensa dos servizos públicos é unha causa común que nos implica a todas e todos, porque cando se privatiza un servizo esencial, pérdese un dereito colectivo. Non calaremos ante este intento de converter o dereito en privilexio.
Seguiremos na rúa, loitando ao carón das familias e dos colectivos sociais, porque sabemos que xuntas somos máis fortes. A cidadanía de Ourense non permitirá que se ignore a súa voz, e esiximos á Xunta que asuma as súas responsabilidades: o CAPD é público e público debe permanecer.
