Pérez Jácome participou no acto de remate da exposición retrospectiva dos seus 40 anos, na Sala Valente
O alcalde de Ourense, Gonzalo Pérez Jácome, asistiu este mediodía aos actos de peche da exposición de 40 anos de #estiloverino, retrospectiva do deseñador ourensán na Sala Valente. Na súa intervención, o rexedor eloxiou a traxectoria profesional de Roberto Verino, na súa tripla condición de “empresario, artista e patriota”, que mantivo e mantén a súa actividade en Ourense.
Pérez Jácome puxo en valor a achega de Roberto Verino: “é un empresario que vive do sector privado, polo que é un heroe”, xa que isto –explicou o rexedor- significa “vivir das decisións que toman os clientes día tras día”. Amais, dixo, “é un artista porque para o mundo da moda necesitas ser un auténtico creativo, e patriota, porque podendo irse onde máis facilidades hai, e cabalgar un bo cabalo, como son as grandes capitais, decidiu quedar aquí en Ourense, na súa terra”.
O alcalde realizou estas declaración no acto de remate da exposición, no que tamén interviñeron o presidente da Xunta de Galicia, Alfonso Rueda e Roberto Verino, e continuou cun xantar ofrecido polo deseñador a autoridades e personalidades do mundo da moda, da cultura, da política e da arte.
A mostra retrospectiva, organizada coa colaboración do Concello, estivo aberta ao público na Sala Valente e na rúa do Paseo desde o día 14 de marzo, e pon fin en Ourense ao seu percorrido por distintas cidades españolas.
