A medición xorde a partir das diferenzas detectados entre os límites que recollían as actas, orixinais de 1920, e os rexistros do Catastro.
As novas coordenadas fixas serán validadas polo Rexistro Central de Cartografía, o que lles dará amparo xurídico.
A capital realizará o mesmo proceso con todos os concellos limítrofes.
Os concellos de Ourense e de San Cibrao das Viñas poden, desde hoxe, coñecer o seu límite xeográfico exacto. Técnicos do Instituto Xeográfico Nacional (IGN, do seu nome en castelán) presentaron esta mañá, no salón de plenos, as conclusións dos traballos técnicos de recuperación e replanteo da liña do límite xurisdicional entre ambos concellos, xa que as actas que rexían na actualidade databan de 1920 e, polo tanto, eran inexactas.
Os cálculos presentados polo IGN, ante representantes institucionais de Ourense -entre eles o propio alcalde, Gonzalo Pérez Jácome- e de San Cibrao, así como técnicos de Infraestruturas e de Planeamento e Xestión, establecerán as coordenadas fixas. Estas serán validadas polo Rexistro Central de Cartografía, o que lles dará amparo xurídico. Na última fase, ambos concellos deberán corroborar as medicións para establecelas definitivamente e darlles cobertura legal.
A medición do IGN xorde a partir das diferenzas detectados entre os límites que recollían as actas e os rexistros do propio Catastro. É por iso que a idea do Concello de Ourense é a de repetir o mesmo proceso co resto dos concellos limítrofes: O Pereiro de Aguiar, Coles, Amoeiro, Punxín, Toén e Barbadás.
