A cidade de Ourense celebrará este domingo, día 5 de maio, a tradicional Festa dos Maios, cunha programación de actividades organizadas pola Concellería de Artes e Festexos que se estenderán durante toda a xornada no centro da cidade. Os maios exporanse ao público na rúa do Paseo, onde tamén se cantarán as coplas. As principais novidades da programación deste ano son a confección dunha alfombra floral, un obradoiro de coroas e colares para nenas e nenos, e un concerto de fados, a cargo de María do Ceo, que terá lugar ás 20.00 horas, na Praza Maior.
PROGRAMACIÓN COMPLETA
Alfombra Floral. Dende as 08.30 h, confección dunha alfombra floral por parte da Asociación de Alfombristas do Corpus Christi de Ponteareas, na praza de Euxenio Montes
Obradoiro de coroas. Dende as 10.30 h, confección en vivo de coroas e colares para a cativada na rúa do Paseo.
Exposición de Maios, Dende as 11.00 h, exposición dos maios participantes nos primeiros tramos da rúa do Paseo.
Ruada musical. Dende as 11.00 h, ruada dos xigantes e cabezudos do Concello acompañados de gaiteiros tradicionais.
Canto das coplas. Ás 12.00 h, comezo do canto das coplas ao pé dos maios participantes no concurso
Premios. Ás 19.00 h, entrega de premios aos maios e canto das coplas gañadoras na Praza Maior
Concerto. Ás 20.00 h, fados con María do Ceo na Praza Maior
Un ano máis, o Concello premiará a través dun concurso as mellores coplas e maios que participen nesta edición desta tradicional festa, declarada de interese turístico, que lle dá a benvida á primavera. Outorgaranse premios aos 3 mellores maios artísticos, enxebres e infantís e un premio ao mellor maio creativo (categoría que se recupera este ano). Tamén haberá galardóns ás 3 mellores coplas nas categorías de persoas adultas e infantil. Todos os maios presentados recibirán tamén unha axuda por participar.
