O Edificio Multiusos do municipio de Lobios acolleu hoxe a última xornada que organiza a Deputación de Ourense a través do Plan de Sustentabilidade Turística en Destino “Ourense Termal”, que ten como obxectivo informar a todas as empresas e entidades do sector turístico da Baixa Limia para que se adhiran ao Sistema Integral de Calidade Turística. Este Plan execútase co cofinanciamento da Xunta de Galicia, a Secretaría de Estado de Turismo e a Deputación de Ourense.
O obxectivo desta actuación é promover unha estrutura de xestión permanente, que vele polo incremento da competitividade das empresas turísticas, así como incrementar a satisfacción dos turistas e fomentar a fidelización dos mesmos.
Tal e como explicou a xerente do Plan, Emma González, presente nesta última xornada, trátase do “primeiro paso que debemos dar para consolidar o Sistema de Calidade Turística en Destino da provincia”. Así mesmo, Emma González engadiu que “esta acción permitiunos chegar a numerosas empresas do sector que estaban interesadas en obter a este distintivo e, dese modo, ir da man o sector privado e público para continuar dando pasos para aproveitar a chegada da Alta Velocidade á provincia e atraer a un turismo de calidade”.
O SiCTED ten por obxecto implantar unha metodoloxía desenvolvida pola Secretaría de Estado de Turismo para os servizos turísticos públicos e privados, que contribúe a través de boas prácticas a mellorar a satisfacción do cliente en particular e o posicionamento do destino en xeral.
As xornadas de adhesión desenvolvéronse para as zonas de Monterrei-Verín, Ribadavia e agora con esta última para os da Baixa Limia, cubrindo o territorio dos 15 municipios termais rurais que serán beneficiados do Plan “Ourense Termal” que son: A Arnoia, Bande, Boborás, Baños de Molgas, Cortegada, Cenlle, Castrelo de Miño, Carballiño, Leiro, Lobios, Monterrei, Muíños, Punxín, Ribadavia e Verín.