Esta mañá, mércores día 4 de decembro, ás 10:00 h, reuníronse na Concellería de Urbanismo do Concello de Ourense todos os grupos políticos que forman parte da comisión de seguimento da revisión e adaptación do Plan Xeral de Ordenación Urbana de Ourense de 1986. Tamén asistiron á sesión técnicos municipais do Servizo de Plan e Xestión Urbanística que se encargan técnica e xuridicamente da tramitación do documento. A reunión foi presidida polo concelleiro de Urbanismo, Francisco Lorenzo López .
Os principais asuntos sobre os que se informou e debateu na reunión foron:
- As modificacións propostas polos técnicos municipais, que se centraron en incluír novas dotacións para usos deportivos en distintas zonas da cidade; flexibilizar os posibles usos aos que se poden destinar equipamentos públicos xa previstos no documento e crear novos parques municipais de barrio vinculados ás ribeiras dos leitos fluviais de importantes zonas arborizadas xa existentes.
- Así mesmo, identificáronse e explicaron modificacións incluídas no documento de aprobación provisional a pedimento do alcalde, Gonzalo Pérez Jácome.
- Por último, resolvéronse as dúbidas dos distintos grupos políticos relativos a cuestións varias que expón o documento e a súa tramitación, relativas á seguridade xurídica, ao cumprimento de sentenzas xudiciais, á conveniencia ou necesidade dunha nova información pública, á situación dos informes sectoriais e aos trámites que haberá que realizar ata a aprobación definitiva.
