A Plataforma en Defensa pola Defensa da Seguridade na N-120 co apoio de todos os grupos da Corporación do Concello de Ponteareas reiterou ao Estado a necesidade de manter unha reunión urxente co delegado do Goberno en Galicia para coñecer o estado actual da redacción do proxecto comprometido para mellorar a seguridade desta vía.
Desde a plataforma lamentan os “moitos meses de silencio” e a falta de resposta ás peticións realizadas ata o momento, unha situación que consideran “inaceptable” dada a importancia e a perigosidade da estrada N-120.
A entidade advirte de que, no caso de continuar sen recibir resposta por parte do Estado, os membros da plataforma trasladaranse ata a sede da Delegación do Goberno na cidade da Coruña “ata ser escoitados”.
Así mesmo, anuncian que retomarán os cortes de estrada e as mobilizacións cidadás se continúa a actual situación de “parálise” arredor das actuacións comprometidas para mellorar a seguridade viaria na N-120.
A Plataforma insiste na necesidade de avanzar con urxencia nun proxecto que consideran fundamental para garantir a seguridade das persoas usuarias dunha das principais vías de comunicación do interior de Galicia.
