A terceira edición do Talento Xove de danza celebrada esta fin de semana no Auditorio de Ponteareas rexistrou unha magnífica entrada, con máis de 800 asistentes, que encheron o patio de butacas durante as cinco horas que durou a competición, que estivo dividida en dúas galas segundo as idades dos participantes: as categorías baby e infantil por unha banda e as categorías cadete e xuvenil pola outra, coas diferentes disciplinas de clásico, moderno, individual, dúos e tríos en cada unha delas.
A competición contou coa participación das escolas de baile Escuela de Danza Namanac’s, Vai de Baile, Metamorfosis, CDM Centro de Música Moderna e Maison Música e Danza, que puxeron en escena un total de 52 coreografías nas diferentes disciplinas de clásico, moderno, individual, dúos e tríos.
Durante máis de cinco horas de espectáculo, o público puido desfrutar da enerxía, creatividade e talento da mocidade ponteareá, nun evento impulsado polo Concello para promover e recoñecer as capacidades artísticas dos mozos e mozas da vila.
O concelleiro de Xuventude, Cristian Montes, destacou “a paixón e implicación dos participantes” e celebrou “a gran resposta do público nun evento que xa se consolida como unha cita de referencia para a mocidade de Ponteareas”.
Pola súa parte, a alcaldesa de Ponteareas, Nava Castro, encargada de clausurar o certame, salientou que “desde o Concello seguiremos apostando por iniciativas que dean visibilidade ao talento da nosa mocidade e lles ofrezan espazos para crecer, expresarse e compartir o seu traballo”.
Talento Xove consolídase así como unha das grandes citas culturais e xuvenís do municipio, combinando promoción artística, convivencia e participación. O concurso continuará nos próximos días coas finais doutras disciplinas artísticas.
LISTAXE DE GAÑADORES:
Gañadores Talento Xove na categoría baby/Infantil na disciplina de danza
Baby Clásico: Ballet CDM – Bruxas
Baby Moderno: Babys Namanac´s – Boro Boro
Infantil Moderno: Bubbles Metamorfosis – Ratatouille
Infantil Clásico: Contemporáneo CDM – Monstros debaixo da cama
Infantil individual/dúos/tríos: María Bodarenko – Cisne Negro
Gañadores Talento Xove en la categoría cadete/xuvenil na disciplina de danza
Cadete clásico: Ballet maiores CDM Berghain
Cadete Moderno: A&A Metamorfosis – Bitelchus
Xuvenil Moderno: Meraki metamorfosis – Mortais
Cadete individual/dúos/tríos: Sandra – Runa
