O presidente provincial, acompañado polo deputado de Cultura, Jorge Cubela, amosa o apoio do goberno provincial á cultura e ao sector da literatura nun acto que contou co espectáculo do ilustrador Marc Taeger e o narrador Caxoto no Pazo provincial
O presidente da Deputación de Pontevedra, Luis López, animou aos escolares do colexio Froébel de Pontevedra a descubrir “os segredos que agochan os contos” nunha actividade de contacontos organizado no Pazo provincial para celebrar, este 23 de abril, o Día do Libro. O mandatario provincial e o deputado de Cultura, Jorge Cubela, presentaron aos preto de vinte alumnos a alumnas de primeiro ciclo de Primaria deste centro pontevedrés dous dos seus contos favoritos antes de dar paso ao espectáculo do contacontos Caxoto e o ilustrador Marc Taeger. “Cando sexades maiores ídesvos lembrar sempre do primeiro libro que lestes, así que anímovos a que leades moito”, díxolles Luis López aos escolares.
A Deputación de Pontevedra vestiu o vestíbulo do Pazo provincial para a celebración do Día do Libro con estantes cheos de libros, contos e ilustracións infantís, así como coxíns no chan onde sentaron os nenos para desfrutar do espectáculo de Caxoto y Taeger, que interpretaron a dous simpáticos pintores que encheron de risas e cor a sede da Deputación. Un acto que serviu para poñer en valor a importancia das librarías da provincia como eses “espazos tan bonitos cheos de historias e aventuras”, definiu o deputado Cubela. Ademais a Deputación complementa este acto coa posta a disposición da cidadanía da provincia dun espazo na páxina web do organismo provincial cos mellores libros infantís que recomendan as editoriais de Galicia, así como unha actividade titulada “Crea o teu primeiro libro” para que os máis pequenos da casa xoguen a ser escritores e a escribir as súas primeiras historias.
Ademais, a xornada rematou cunha lectura conxunta dunhas pasaxes dos libros favoritos do alumnado. Unha proposta na que tamén participou o presidente López, que recomendou dous libros moi especiais elixidos polos seus fillos: “Adivina cuánto te quiero” e “Fiz, o coleccionista de medos”. Tamén o deputado Cubela realizou a súa achega animando a ler “A Galiña Azul”, de Carlos Casares.
“A Deputación é a casa de todos os pontevedreses e pontevedresas, pero tamén é a casa dos libros”, concluíu Luis López para explicar á cativada para que serve a Deputación de Pontevedra.
