test
Home Pontevedra Deza Multiplícanse as novidades na Feria Internacional Abanca Semana Verde 2024, que arranca...

Multiplícanse as novidades na Feria Internacional Abanca Semana Verde 2024, que arranca o vindeiro xoves

- Anuncio -
  • DESTACAN AS PARTICIPACIÓNS DE EMPRESAS E ENTIDADES POR PRIMEIRA VEZ EN TODOS OS SEUS ESPAZOS, ESPECIALMENTE NOS SALÓNS DE ALIMENTACIÓN E TURISMO
  • TAMÉN HABERÁ GRAN CANTIDADE DE ACTIVIDADES NOVAS NAS DIFERENTES ÁREAS DO CERTAME, O CAL SE CELEBRARÁ NO RECINTO FEIRA INTERNACIONAL DE GALICIA ABANCA DO 30 DE MAIO AO 2 DE XUÑO

A 46ª Feira Internacional Abanca Semana Verde de Galicia, que se celebrará do 30 de maio ao 2 de xuño, volve contar cun gran número de novas participacións nas diversas áreas da mostra, especialmente nos seus salóns de alimentación e turismo, as cales se suman a moitas outras que repiten ou son xa veteranas.

Así, en Turexpo Galicia, entre outras novidades da súa área expositiva, está a presenza de novas axencias e empresas, destinos nacionais como Aragón e internacionais como Cuba, e tamén concellos galegos que participan por primeira vez en Festur coas súas festas de interese turístico, como Coristanco, Taboada, Touro, Teo ou Vilagarcía. Ademais, na súa Bolsa de Contratación Turística por primeira vez os participantes poderán reunirse con operadores turísticos con presenza en Xordania e Filipinas.

En canto a Salimat Abanca, entre outras, estréase a oferta gastronómica da La Palma, Valencia, Palencia ou o Concello de Covelo, ademais de produtores tanto nacionais como portugueses que acoden por primeira vez para presentar produtos artesáns, gourmet ou ecolóxicos. E tanto destas empresas que se estrean no certame como doutras xa habituais, poderán verse preto de sesenta novidades alimentarias na área Alinova, desde marmelada con allo negro ou aceite con esencia de ancho a vinagre de arandos ecolóxicos ou paté de porco celta con froito de érbedo e millo corvo.

Nos demais espazos de Abanca Semana Verde tamén haberá novidades, tanto en sistemas de bioenerxía, ferramenta e pequena maquinaria como en xardinería ou gandería.

Novas actividades

Tamén no programa da feira estrearase un gran número de actividades. Serán moitas no salón alimentario, entre elas, novos showcookings e degustacións de Comunidades Autónomas, da Axencia Galega de Calidade Alimentaria (Agacal), da Consellería do Mar, das cooperativas presentes coa Consellería de Emprego, Comercio e Inmigración e da Consellería de Educación, Ciencia, Universidades e Formación Profesional, coa que estarán presentes diversas escolas de hostalería. Tamén serán novos os obradoiros para levar a cultura do queixo aos máis pequenos, o restaurante das razas autóctonas Tapirazas presentarán novos e deliciosos menús e as sesións de cociña en vivo contará con debutantes no salón, como o chef Julio Mato, do programa de Televisión de Galicia A Voltas co Prato, e a barman Sonia García, que desempeña o seu traballo no Hostal dos Reis Católicos. 

Na área de gandería haberá razas de ovino selecto presentes por primeira vez e despois de moitos anos, volverá celebrarse unha “rapa das bestas” nun curro con eguas do monte e a participación de varios grupos de aloitadores.  Un evento que está financiado pola Xunta de Galicia – Consellería do Medio Rural, Ministerio de Agricultura, Pesca e Alimentación e Fondo Europeo Agrícola de Desenvolvemento Rural: “Europa inviste non Rural”.

Tamén haberá sorpresas nas actividades ecuestres e de motor. Nas primeiras realizarase un sorprendente show con cabalos, ponis, aguias e cans que poñerá o broche final ao programa da feira, participando unha vintena de animais en sete números moi dinámicos de doma en liberdade que combinarán a doma de alta escola con exercicios tan arriscados como a “posta húngara”, na que Paco Martos se subirá a dous cabalos ao mesmo tempo cun pé no lombo (protexido) de cada un deles. En canto aos segundos, haberá dous pases dun espectacular show con acrobacias integrado por un trío de pilotos e sete vehículos, contando con dous especialistas de cinema que traballaron na película Misión Imposible e a única muller española que realiza espectáculos acrobáticos con motos de alta cilindrada.

Ademais, no programa de conferencias abordaranse por primeira vez, de man da Fundación Empresa-Universidade Galega (Feuga), temas como “Novos paradigmas no cultivo da vide: mellora da eficiencia no uso de pesticidas e auga de rega. Proxecto Regavid e Pasmowine”, “Ferramentas dixitais aplicadas á optimización de cultivos agrarios e á mellora da xestión forestal. Proxectos Millopreciso, Purinpreciso e Multiforest” e “Incremento da sustentabilidade agraria, gandeira e industrial a través dun uso eficiente de insumos. Proxectos Funtrapa, Bio_marterra e Sueroval”

Relacionadas

O BNG denuncia o estado de abandono da rúa San Roque e insta a...

0
Desde hai meses, a rúa San Roque vén sufrindo problemas no tramo que discorre entre a gasolineira e a Praza da Independencia como consecuencia...

Adxudicadas as obras de mellora da mobilidade na rúa Trovador Xoán García de Guillade

0
• Completarase a plataforma única no entorno do parque Ferro Ucha e asfaltarase o tramo ata cemiterio • Tamén se rebaixarán os lombos redutores e...

Luis López certifica coa presentación de investimentos por máis dun millón de euros nas...

0
O presidente provincial, xunto coa vicepresidenta Luisa Sánchez, presenta a alcaldes e concelleiros destas comarcas proxectos valorados en máis dun millón de euros incluídos...

O Rosal continúa cos seus ‘Faladoiros no Xardín’ abordando a detección do abuso sexual...

0
A segunda sesión, a cargo da experta Teresa Calvo, será este xoves 20 de xuño ás 20.30 horas O Rosal continúa xerando espazos seguros nos...

Triple victoria para o UD Mos Feminino que se proclama campión galego en Infantil...

0
As abellas mosenses demostran que son a mellor opción para integrar ‘As Celtas’ O Concello de Mos organizoulles esta tarde ás xogadoras da Unión Deportiva Mos Feminino unha recepción...

O tomiñés Manu Ochoa, nos Xogos Olímpicos de París 2024

0
O Concello felicita ao primeiro deportista olímpico de Tomiño por este gran logro O Concello de Tomiño quere trasladar os seus parabéns ao deportista tomiñés...

Publicacións Relacionadas