Marga Caldas anuncia o inicio dunha recollida de sinaturas “para protestar polo incremento da taxa que Moldes quere impoñer de maneira camuflada”
A nacionalista advirte de que facturas de 40 euros pasarán a ser de 100: “cada ducha vai custar un euro”
O BNG de Poio vai presentar alegacións ao ‘taxazo da auga’ que pretende aplicar o goberno de Ángel Moldes e creará un formulario conxunto para facilitar que a veciñanza tamén se poida opoñer á subida do recibo. Ademais, o Bloque iniciará unha recollida de sinaturas en contra da medida. Así o anunciou onte a voceira Marga Caldas nunha reunión coa veciñanza do Bao na que as nacionalistas intentaron poñer luz sobre o ‘tarifazo’ que vai duplicar o custe da taxa actual a causa do novo contrato do servizo.
A reunión de onte no Bao forma parte da campaña informativa que o BNG puxo en marcha para que as veciñas e veciños coñezan de maneira práctica como vai afectar o chamado ‘taxazo da auga’ nos seus propios recibos. Cunha explicación minuciosa, o Bloque aclarou que a taxa incrementarase incluso en máis dun 100% porque o consumo da auga pasará a cobrarse en dous conceptos: o de abastecemento e o de saneamento. Desta maneira, unha familia que actualmente no 2025 pague 248 euros anuais pasará a pagar no 2026 e no 2027 uns 396 euros, e chegará a abonar máis de 531 euros en 2028.
“Vimos casos prácticos de recibos actuais de 37 ou 40 euros que, facendo os cálculos coa nova tarifa, van pasar a ser de 100 euros. É unha subida totalmente desproporcionada. Facendo as contas sobre cousa moi prácticas: algo tan simple como darse unha ducha vai pasar a custar un euro. Se falamos de casas unifamiliares que teñan rego ou piscina, entón o gasto será desmesurado”, subliña Caldas.
A nacionalista advertiu que “estamos ante un novo despropósito de Ángel Moldes, que chegou prometendo a baixada e eliminación de impostos e en menos de dous anos fixo todo o contrario, cunha espectacular subida do recibo da auga que quere camuflar a pesares de que é a maior subida impositiva en moitos anos”.
Caldas destacou que a auga é un produto de consumo imprescindible independemente do poder adquisitivo das familias, polo que destacou que o goberno local debería ser máis “sensible” e levar adiante unha política fiscal máis responsable e xusta para “non afogar á xente”. Insistiu en que o Bloque está a favor do novo contrato para facer obras e mellorar o abastecemento, pero cun proxecto que non repercuta de maneira tan lesiva nas economías particulares.
Coa intención clara de frear o ‘tarifazo’, e dado que nestes momentos o estudo económico do novo contrato da auga está en fase de exposición, o Bloque presentará alegacións propias cando se inicie a licitación. Tamén elaborará un impreso para permitir que a veciñanza manifeste a súa oposición de maneira sinxela e directa á subida, ademais de iniciar unha recollida de sinaturas que presentará ante o goberno local.
Caldas destacou que a veciñanza de Poio está a ser moi participativa nos encontros veciñais que o Bloque organizou ata agora tanto en Portosanto como en O Bao. Convidou a asistir ás próximas reunións cos recibos para coñecer de primeira man como vai subir a auga a cada familia. A seguinte xuntanza será o vindeiro 10 de abril en Combarro, no local da comunidade de montes ás oito da tarde.
Ademais, Caldas lamentou que o goberno local, en lugar de ser transparente cos datos, estea a torpedear a campaña informativa do Bloque. Subliñou que se na primeira convocatoria o Concello rexeitou a petición do BNG para o local en Portosanto, onte no Bao a sala municipal reservada polas nacionalistas estaba ocupada con outro encontro presidido polo alcalde Moldes, polo que a explicación sobre o ‘taxazo’ tivo que atrasar o seu inicio.
“Entendemos que Moldes se poña nervioso porque poñemos en evidencia que en lugar de baixar impostos súbeos, pero cremos debe gardar as formas e respectar o noso labor, que é informar ás veciñas e ós veciños, sen poñer paus nas rodas a todas e cada unha das reunións que organizamos”, apunta Caldas.
