Na parroquia de Paradela, concretamente no lugar O Noval en Lantañón, hai un camiño que da acceso a varias vivendas que precisa dunha intervención urxente, trátase dun camiño asfaltado que debería dar paso a vehículos, pero que se atopa en moi mal estado, e no que existe un desnivel importante que xera perigo e que pode acabar dando lugar a un accidente. Ademais xa non é a primeira vez que unha ambulancia ten que acudir á vivenda sendo imposible que esta acceda por ese camiño, o que implica un traslado da persoa até a ambulancia ou dos sanitarios até a vivenda que complica moito a situación.
Estes veciños expuxeron o seu problema desde o inicio do presente mandato, e chegouse a orzamentar a devandita intervención e arranxo do camiño nos orzamentos do 2021, así se lles transmitiu aos veciños e ademais foi unha das demandas que o BNG expuxo concretamente para que se contemplasen nos orzamentos, sendo admitido e incluído finalmente nos orzamentos polo equipo de goberno.
No en tanto, transcorrido moito tempo desde que as obras foron orzamentadas, estas non foron executadas nin se fixo a máis mínima xestión tendente á súa realización.
Por estas razóns o BNG pide que se inicien de forma inmediata todas as xestións necesarias tendentes á mellora do camiño de acceso ás vivendas do lugar do Noval de Lantañón na parroquia de Paradela.