- Baixo o lema internacional “Quere o teu mercado”, a iniciativa busca incentivar o consumo de produtos de proximidade e calidade artesanal.
- A campaña contará con actividades promocionais e o sorteo de varias cestas con vales de compra para premiar a fidelidade da clientela.
- O alcalde, Horacio Gil, destaca a Praza como un piar fundamental para a sustentabilidade económica e social do municipio.
Concello de Arbo, nunha aposta decidida por fortalecer o tecido comercial da vila, lanza unha nova edición da campaña promocional “Quere o teu mercado”. Esta acción, que se consolidou como unha cita imprescindible no calendario local, ten como obxectivo principal poñer en valor a Praza de Abastos como o corazón do consumo responsable, sostible e de calidade no municipio.
A campaña, organizada pola administración local coa estreita colaboración dos praceiros e o apoio da Xunta de Galicia, desenvolverase de xeito ininterrompido desde o 6 de maio ata o próximo 17 de xuño. Durante estas semanas, o mercado municipal non só será un punto de venda, senón un escenario de dinamización social que busca atraer tanto á veciñanza de sempre como ás novas xeracións de consumidores.
O gran atractivo desta edición será o certame “Vén á Praza do Mercado e Gaña”. Co fin de incentivar o gasto no comercio de proximidade, o Concello distribuirá premios directos entre os usuarios do mercado. Nesta ocasión, sortearanse: Unha cesta que inclúe un vale de compra por valor de 50 euros e Dúas cestas cada unha delas acompañada dun vale de 25 euros.
O rexedor de Arbo, Horacio Gil, quixo salientar o valor estratéxico desta campaña para o futuro rural: “A nosa Praza de Abastos é moito máis que un mercado; é un punto de encontro e un símbolo da calidade de vida que ofrece Arbo. Con esta campaña, queremos que cada veciño e veciña sinta o orgullo de consumir produtos frescos que viaxan directamente da horta ou do mar ao noso mostrador, sen intermediarios innecesarios”, explicou o alcalde.
Para participar, o procedemento é sinxelo e directo: por cada compra realizada en calquera dos postos da Praza, os clientes recibirán a posibilidade de depositar o seu ticket de compra —debidamente cumprimentado cos seus datos— nunha urna instalada no propio recinto. O prazo de participación permanecerá aberto ata o 17 de xuño ás 13:00 horas, momento no que se procederá á extracción das papeletas gañadoras nun acto público aberto a toda a cidadanía.
A campaña “Quere o teu mercado” (coñecida internacionalmente como Love Your Local Market) sitúa a Arbo no mapa das vilas que reivindican o papel dos mercados tradicionais fronte ás grandes superficies. Ao fomentar o consumo de produtos de quilómetro cero, o Concello contribúe a reducir a pegada de carbono e a protexer a biodiversidade agraria da comarca.
Gil fixo tamén fincapé no impacto laboral da iniciativa: “Cada vez que un arbense escolle a Praza para facer a súa compra, está axudando a manter postos de traballo directos e está garantindo que os pequenos produtores locais poidan seguir vivindo da súa actividade. Apoiar o noso mercado é construír unha economía circular real que beneficia a todo o concello. Queremos que Arbo redescubra o trato humano e a confianza que só un praceiro pode ofrecer”.
A Praza de Abastos de Arbo consolídase así como un espazo de confianza e excelencia, onde a calidade do produto fresco se une ao compromiso co desenvolvemento económico local e o trato personalizado.
