O concelleiro de Servizos Urbanos Básicos, Xaquín Moreda visitou esta mañá aos voluntarios que están a limpar a praia da Posta, no Cabo, en Lourizán dentro do programa Súmate que a empresa Prezero, concesionaria do servizo de limpeza viaria e recollida de residuos en Pontevedra, está a desenvolver en Galicia.
Súmate é o programa de acción social da empresa para mellorar as condicións de vida das persoas en situación de vulnerabilidade e contribuír a contornas máis sostibles nos lugares que traballa. O programa Súmate realiza anualmente un concurso aberto en dous ámbitos: inclusión sociolaboral e concienciación ambiental, aos que se presentan fundacións e ONGs, que recibirán unha contía económica recadada entre os traballadores da empresa e a propia compañía.
En Galiza, foi a asociación LimpOcean a que desenvolveu o proxecto « Rincones mágicos. Limpieza y concienciación sobre la contaminacion plástica en la Costa da Morte », coa que implica activamente á poboación na erradicación do lixo mariño. Limparon praias en Nigrán e Sada.
