O PP esixe ao Ministerio de Transportes a mellora integral do firme e da seguridade viaria nos 60 quilómetros das catro estradas nacionais de Caldas e O Salnés

• Os populares destacan o apoio da Deputación tras a aprobación dunha proposta do PP Provincial solicitando a modernización de toda a rede estatal de Pontevedra e danlle continuidade coa petición de medidas urxentes de renovación na N-550, N-550A, N-640 e N-640A para mellorar a mobilidade dos seus 33.170 usuarios diarios
• A deputada provincial Isabel Couselo e o voceiro do PP de Caldas, Fernando Pérez, advertiron que as estradas estatais na zona “atópanse peor ca nunca cun deterioro evidente e perigoso”, que tamén foi denunciado por condutores, transportistas e veciños dos seis concellos

O PP vén de esixirlle ao Ministerio de Transportes y Movilidad Sostenible que acometa de xeito urxente a mellora integral do firme e a adopción de medidas de seguridade viaria nos 59,9 quilómetros das catro estradas nacionais que percorren as bisbarras de Caldas e O Salnés, a N-550 e a N-640 coas súas variantes urbanas da N-550A na capital do Umia e da N-640A en Vilagarcía, xa que se atopan nun estado moi deficiente por mor da nula ou escasa labor de mantemento e conservación ao longo dos últimos seis anos.

Os populares fixeron esta reclamación ao pé da N-640 en Caldas de Reis coa presenza dos deputados Ana Pastor e Pedro Puy, o senador José Crespo, os deputados autonómicos María Deza e María Martínez Allegue, os deputados provinciais Isabel Couselo, Javier Tourís e Marcos Guisasola, os alcaldes Ricardo Martínez, Sito Gómez e José María Bello e os voceiros Fernando Pérez, Ana Granja, Manuel Vidal e Estefanía Frieiro.

Os representantes do PP nas distintas cámaras e nestes municipios destacaron o apoio a esta reivindicación, “que se fai máis necesaria ca nunca porque as estradas nacionais están no peor estado da súa historia”, por parte da Deputación de Pontevedra, que vén de aprobar unha proposta do PP Provincial solicitándolle ao Goberno de España a inmediata modernización desta rede estatal nos 317,5 quilómetros das 11 vías destas características que percorren 27 municipios de Pontevedra.

Os populares sinalaron que as catro estradas nacionais que percorren Caldas e O Salnés polos concellos de Vilagarcía, Caldas, Pontecesures, Valga, Portas e Cuntis –que teñen case o 20% dos quilómetros totais das estradas nacionais da provincia– presentan numerosas deficiencias e desperfectos, sobre todo no que se refire ao estado do firme con innumerables fochancas, fendas e desniveis na plataforma, graves problemas de drenaxe, mala sinalización, falla de visibilidade, peraltes deteriorados e cruces perigosos, como consecuencia das escasas ou nulas labores de mantemento e conservación realizadas polo Ministerio de Transportes nos últimos seis anos.

Ademais, indicaron que estas catro estradas de titularidade estatal alleas ás vías de alta capacidade son fundamentais para a vertebración e a mobilidade dos veciños destas bisbarras, posto que son empregadas diariamente por ata 33.170 usuarios por xornada, segundo os datos oficiais de Intensidade Media Diaria (IMD) do propio Ministerio de Transportes.

En concreto, as estradas sobre as que se demanda unha actuación urxente son as seguintes:

Ao respecto, a deputado provincial Isabel Couselo, que tamén presentou mocións de mellora da N-640 no seu Concello como voceira de Cuntis, explicou que esta proposta “é máis que xusta e necesaria porque o deterioro é evidente e perigoso e xurde do propósito do PP de defender ao noso territorio e esixir as melloras que nos corresponden fronte ao maltrato e abandono ao que nos ten sometido o PSOE desde o Goberno de España e, sen dúbida, o mal estado destas catro estradas nacionais é unha das principais preocupacións dos milleiros de usuarios que as empregan cada día”. “Invístese tres veces máis nesta materia en Cataluña malia ter unha rede estatal máis cativa ca galega, e o Goberno de España aínda ten proxectadas ou en marcha certas actuacións nas provincias de Lugo e A Coruña, pero a nosa provincia tena completamente de lado e iso afecta gravemente á seguridade viaria”, detallou Couselo.