- A cita deportiva, organizada pola Asociación de Veciños O Percamino, celebrarase a partir das 16:00 horas na rúa As Pozas, na Gándara
A Guarda, 2 de setembro do 2026 – A programación da Festa das Mercedes 2026 continúa este sábado, 5 de setembro, no Concello da Guarda cunha das citas deportivas e tradicionais máis agardadas: o XVII Torneo de Cachiza, que se desenvolverá a partir das 16:00 horas na rúa As Pozas, na Gándara.
A actividade está organizada pola Asociación de Veciños O Percamino, que alcanza xa a décimo sétima edición deste torneo, consolidado como unha das propostas de carácter popular que forman parte da programación festiva e que contribúen a manter vivas as tradicións.
As persoas interesadas en participar poderán facelo por parellas, cunha cota de inscrición de 10 euros por parella. As inscricións permanecerán abertas ata as 15:30 horas do propio sábado, polo que os participantes deberán formalizar a súa inscrición antes do inicio da competición.
O torneo contará tamén con premios para as dúas primeiras parellas clasificadas, que recibirán trofeo e unha cea como recoñecemento ao seu resultado na competición.
Para obter máis información sobre o torneo ou as inscricións, as persoas interesadas poden contactar cos teléfonos 669 031 798 (Tebi) e 680 340 784 (Roge).
