Xoán Reices: “Este sector axuda a manter vivo o noso rural e neste sentido na nosa organización cremos que debemos dar apoio e botar unha man para afianzar o sector e fortalecer así o tecido socio-económico do noso concello
O BNG da Estrada mantivo no día de hoxe un encontro de traballo co sector sidreiro do noso concello. Na reunión participou o concelleiro, Xoán Reices, e a deputada no Parlamento Galego, Ariadna Fernández.
O obxectivo deste encontro, segundo explicou o concelleiro nacionalista é “coñecer de primeira man, a través de representades do sector da sidra do noso concello, o estado actual do mercado galego, prezos de venda que se manexan, así como os custos actuais de produción”.
“Por outra parte”, indicou Reices, “tamén queremos coñecer as expectativas dos e das produtoras de sidra, a respecto do apoio que poden recibir das administracións, tanto local como autonómica”. “Neste sentido”, engadiu o concelleiro do BNG, “logo deste reunión elaboraremos unha serie de iniciativas, tanto a nivel de localidade como de país, para trasladar as necesidades e peticións do sector”.
“No BNG cremos que o sector da mazá ten unha importancia cada vez maior no noso concello”, explicou Reices, “axuda a manter vivo o noso rural e neste sentido na nosa organización cremos que debemos dar apoio e botar unha man para afianzar o sector e fortalecer así o tecido socio-económico do noso concello”.
O BNG pide solucións para a Praza de Abastos
O portavoz municipal do BNG, Xoán Reices, tamén se referiu á situación da Praza de Abastos da Estrada, explicando que “desde a nosa organización xa alertamos en varias ocasión dos sinais de alarma que emitía a Praza, pedindo ao concello plans para revitalizala e impulsala”. “É evidente que o goberno do PP nada fixo”, engadiu “e agora está na situación que está, cun só posto aberto de xeito permanente; unha situación que contrasta coa vitalidade doutras prazas, sen ir máis lonxe, a de Santiago de Compostela, que pon en evidencia que as cousas poden facerse mellor e doutro xeito”.
“Neste sentido”, engade Reices, “pedimos ao goberno do PP que se poña as pilas, que fale cos e cas praceiras para ver de mellorar esta situación, así como programas de concienciación sobre os beneficios, non só sociais e económicos, senón tamén para a saúde, de consumir produtos de proximidade”. “O alcalde non pode seguir de brazos cruzados”, afirma o concelleiro do BNG.
