— Ángeles Vázquez explica que, unha vez adxudicado o contrato de construción, a previsión é que as obras comecen antes de que remate o primeiro trimestre deste ano co obxectivo de que estean rematadas a finais de 2025
— A futura EDAR está deseñada para dar servizo aos 2.310 habitantes esperados no horizonte do ano 2040
A Xunta de Galicia vén de adxudicar por máis de 2 millóns de euros a construción dunha nova estación depuradora de augas residuais (EDAR) co obxectivo de mellorar o servizo de saneamento no Concello de Salvaterra de Miño.
Durante unha visita á contorna na que se localizará a nova instalación hidráulica, a conselleira de Medio Ambiente e Cambio Climático, Ángeles Vázquez, explicou que, unha vez adxudicado o contrato de construción, a previsión é que as obras comecen antes de que remate o primeiro trimestre deste ano co obxectivo de que estean rematadas a finais de 2025.
Logo de indicar que esta actuación está financiada pola Xunta e o Concello e conta tamén con conta con fondos da Unión Europea a través do Fondo Europeo Agrícola de Desenvolvemento Rural (Feader), a conselleira engadiu que a futura instalación hidráulica, que se construirá na conca do río Mendo, está deseñada para dar servizo aos 2.310 habitantes esperados no horizonte do ano 2040 en sete parroquias do concello -Leirado, Soutolobre, Corzáns, Fiolledo, Oleiros, Meder e Salvaterra-.
A nova EDAR, que está formulada para un caudal punta de 118,08 m3/h, integrará os procesos de pretratamento, by-pass xeral, bombeo e medida de auga bruta, medida da auga a tratar mediante caudalímetro electromagnético, decantación primaria e reactor biolóxico mediante biodiscos.
Ademais da nova estación depuradora, os traballos comprenden tamén outras actuacións como a construción dun colector de conexión á rede da parroquia de Oleiros, un pozo de bombeo ou un colector-emisario para o vertido do efluente xa depurado ao río Miño.
Para concluír, a conselleira, que estivo acompañada polo director de Augas de Galicia, Roi Fernández, incidiu en que, aínda que a prestación dos servizos de saneamento e abastecemento son unha responsabilidade de competencia municipal, a Xunta leva anos prestando o seu apoio técnico e financeiro aos concellos que o necesiten no marco dunha estratexia coa que busca ofrecer unha alternativa de xestión autonómica dos servizos da auga.
De feito, o orzamento de Augas de Galicia para 2025 ascende a 144 millóns de euros, dos que 73 millóns de euros se destinarán á mellora das infraestruturas do ciclo da auga para seguir apoiando aos concellos no exercicio das súas competencias en materia de xestión da auga e facer un uso eficiente dela para reducir a pegada hídrica no conxunto da comunidade mediante investimentos nas redes de saneamento, depuración e abastecemento.
