O obxectivo é adaptar a urbanización existente para facilitar a implantación de empresas de todo tipo e non só dedicadas ao transporte, como se prevía inicialmente
A Xunta destinará un investimento estimado de 64.493,12 euros na redacción dos proxectos de urbanización e parcelamento da Central de Transportes de Ponte Caldelas. Os interesados no contrato, cuxo procedemento de licitación se iniciou hoxe, poderán presentar as súas ofertas ata o vindeiro 19 de marzo.
O ámbito da actuación, cunha superficie total de 86.964 metros cadrados, está situado nunha zona de suaves pendentes no entorno da cidade de Pontevedra que limita ao sur coa ampliación do polígono industrial de Reigosa, do que está separado pola estrada provincial de Reigosa-Pinto, e ao oeste co polígono industrial do Campiño.
O proxecto cuxa redacción foi licitada hoxe servirá para adaptar os terreos da Central de Transportes a usos industriais xenéricos. Cómpre lembrar que o ámbito está nunha situación de urbanización case completa, coas obras contempladas no proxecto sectorial practicamente rematadas. Así, o obxectivo da urbanización e parcelamento é adecuar as obras existentes ao aprobado na modificación puntual do proxecto sectorial e facilitar así o asentamento de empresas dedicadas a actividades diferentes do transporte.
En concreto, o proxecto urbanizador contemplará a adaptación das parcelas e da súa superficie para a introdución no deseño de beirarrúas adecuadas para o tránsito peonil, que se completarán cunha rede de sendas verdes; a mellora da mobilidade rodada, coa proposta dunha nova rotonda que flexibilizará os percorridos no interior do ámbito; a mellora da mobilidade alternativa grazas ás sendas verdes permitirán o uso peonil pero tamén a utilización da bicicleta no ámbito. A continuidade destas sendas no futuro permitirá favorecer con claridade outros tipos de mobilidade.
Así mesmo, tamén se mellorará a accesibilidade mediante a proposta dun acceso e unha saída novos pero sen introducir distorsións no sistema viario e aproveitando ao máximo a urbanización xa executada, e a integración medioambiental e ecolóxica das zonas verdes e áreas axardinadas no sistema viario.
En resumo, a proposta intentará aumentar as superficies de zonas verdes públicas, manter a superficie edificable prevista no mesmo e incrementar a reservada ao sistema viario, de xeito que se poidan resolver adecuadamente os distintos tipos de mobilidade.
