_Subliña o excelente momento do atletismo galego que nos Xogos de París igualou o seu récord histórico con sete representantes
O secretario xeral para o Deporte, José Ramón Lete Lasa, participou na mañá de hoxe na presentación do Campionato de España Absoluto e Máster de Marcha en Ruta 35 km e do Campionato de España sub 20 e sub 16 de Marcha por federacións autonómicas que terá lugar en Marín o vindeiro 9 de marzo.
Na presentación estiveron presentes dous dos mellores marchadores galegos que competirán na proba nacional como é o caso dos irmáns Chamosa, Antía e Daniel. O mandatario galego destacou a gran proxección dos dous atletas como dous dos mellores do contexto nacional e mesmo internacional e lembrou como Antía foi convocada para os Xogos Olímpicos de París, aínda que finalmente non competiu na proba de remudas mixtas na que Álvaro Martín e María Pérez, acadaron a medalla de ouro. Para Lete Lasa, o Campionato de España de Marín será “unha excelente oportunidade de ver aos mellores marchadores do país, así como de vivir este reencontro competitivo entre Antía e María, dúas das referencias da marcha feminina española”. Ademais, dixo, a relevancia de Galicia na marcha nacional complétase coa figura do vigués Santi Pérez, olímpico en Atenas e Pequín e que na actualidade é o seleccionador nacional da especialidade.
O secretario xeral para o Deporte gabou o excelente momento do atletismo galego que nos devanditos Xogos de París igualou o seu récord histórico de participantes con sete, os mesmos que o fixeran en Barcelona 1992. Este panorama cheo de grandes referentes galegos é o que anima a que cada día máis nenos e nenas se animen a participar no atletismo, polo que considerou outra excelente noticia que Marín tamén acolla o campionato nacional sub 16 e sub 20.
