O director de Turismo de Galicia, Xosé Merelles, desprazouse esta mañá ao Concello de Teo para manter un encontro coa alcaldesa deste municipio, Lucía Calvo, e analizar distintas actuacións para a posta en valor do contorno natural do Camiño Portugués ao seu paso por este concello.
O director de Turismo de Galicia e a rexedora visitaron distintos tramos que percorren os peregrinos, visitando núcleos municipais como Faramello, no contorno do Albergue de Peregrinos de Teo, pertencente á rede do xacobeo; a Carballeira de Francos e tamén o trazado polas Galanas, próximo ao lavadoiro municipal. Xosé Merelles salientou a importancia do mantemento e embelecemento destas zonas que contribúen a xerar unha experiencia dos peregrinos que optan por esta ruta.
