Os traballos teñen un custo de 22.200 euros e darán servizo a cinco vivendas
O Concello de Soutomaior acaba de iniciar os traballos de ampliación na rede de rede de sumidoiros do barrio de O Val. A mellora ten o obxectivo de aumentar a capacidade de evacuación da rede no devandito punto para garantir o correcto funcionamento do sistema.
Así, a mellora no saneamento realizada no barrio de O Val comprende a renovación completa dun ramal de canalizacións de case 100 metros de longo destinado á recollida de augas residuais por gravidade e a súa conexión ao sistema xeral de rede de sumidoiros.
Ademais da mellora en saneamento, os traballos comprenden a renovación total da capa de rodadura do vial, “polo que a mellora no vial será completa”, explicou o alcalde de Soutomaior, Agustín Reguera, que cualificou os traballos como “pequenas melloras que, a pesar de que non ven, son de gran utilidade para os veciños e para o medio ambiente”. Os traballos contaban cun orzamento final de 22.266,67 euros que foron financiados exclusivamente con fondos procedentes das arcas municipais.
