Esta semana comezaban os traballos de consolidación da Fonte da Casa da Inquisición en Corzáns, ben protexido por patrimonio cultural. Estas obras contemplan accións e medidas dirixidas ao afianzamento, reforzo e substitución de elementos danados ou perdidos para asegurar a estabilidade do ben, co fin de salvagardar e protexer os bens culturais do municipio, un ben que se atopaba nun estado de abandono que estaba provocando a perdida de estabilidade do muro frontal composto por dúas follas, chegando a separarse a cara exterior da interior, cun desplome importante.
Para a súa consolidación será necesario a desmontaxe do muro frontal, así como a retirada da vexetación incontrolada que hai ao seu redor. Para a súa estabilidade, será necesario volver a levantar unha contención lateral esquerda, así como canalizar correctamente se fose necesario, a auga que acomete por detrás do muro.
Esta fonte localízase a 100 metros dos restos do Pazo da Inquisición, e posiblemente dentro da finca matriz. É unha construción con dous muros de contención de sillería labrada de pedra, soterrados por un lado, e que orixinariamente posuía un terceiro muro formando unha composición en forma de “U”, hoxe practicamente desaparecido, que compoñen un espazo recollido que segue proporcionando auga dun canon central. O muro frontal da fonte está dividido en dúas zonas por unha imposta horizontal central, a superior, rematada por unha cornixa (hoxe derruída), conta cunha hornacina no centro, e no inferior se dispón unha pequena bancada con tres hornacinas sobre ela, sendo a central onde flúe a auga, e nas restantes se dispoñen cegas. O muro lateral realízase liso cunha bancada inferior e coroando cunha cornixa. No espazo abrazado pola composición dos tres lados, está formado por un pequeno estanque rectangular, no lado esquerdo, que recolle a auga sobrante que rebosa nun canal de rego, e por unha zona de acceso co chan de terra onde se encontra unha mesa tosca de pedra allea o conxunto.
Este elemento singular mantén a mesma sillería e elementos ornamentais como imposta e cornixa, que a utilizada na Porta da Inquisición, sendo probable que daten da mesma época, finais do século XVII.
